GUZTIZ FIDATURIK

Guztiz fidaturik bizitzea ez ei da ona

—guztiz fidaturik

                martiko lehen kimua bezala—.

Baina gu askeago bizitzeko eginak gaudela uste dut.

Deitoratzen ditugu berri-lapikoak

—mingain luzeok

                begi distiratsuok—.

Baina denekin zabalak eta argiak izateko etorri ginela uste dut.

Isolamenduaren hormak eraiki eta isiltasunaren zuhaixkak

landatu ditugu, behin baino gehiagotan,

gure bizitzen buelta guztian.

Nor ikusiko dugun jakiteak baino areago

nork ikus gaitzakeen, nork zelata

gaitzakeen jakiteak arduratzen gaitu.

Eta hiriko oihuak entzun gura genituzke

baina gure etxeek, azkenaldian,

ostrukak burua sartzeko erabiltzen duen harea multzoa dirudite.