IZAR LOKAK

Dei diezaiogun ordu honi

farolak pizten dituzten ordua.

Egurasten dabilen jendearekin topo egiten dugu,

hizketaldi laburrak ditugu Ganges ibaiari buruz,

berbak neurtu egiten ditugu, lasai goaz

ez dabilen euriaren pean, ez dabilen haizea zeharkatuz.

Nola bikoteak paratxutisten antzera agertu ohi diren

hala atera dira iluntasunetik

hiru gazte hiru itsasontzi bezala eta, leihotik,

diosala egiten digu lore aurpegidun hamabi urteko neskatxak,

ostean aitaren irudi boteretsua guri begira geratu delarik.

Arrosa eta urdin,

kometak zenbaki erraldoiak dira

gau sargori honetan iratzarririk gauden guztiontzat.

Batak bestearen arima desiratzen dugu

eta zaharrek gazteen gorputzen garapen arina miresten dute.

Paseoan dabilen jendearekin topo egiten dugu beraz,

hizketaldi arinak sortzen dira,

ekaineko arratsalde soil bat litzateke

haragia noraino iristeko gauza den ez bageneki.