PAGANOAK ULERTU DU

Orratzekin finkatu gura nituzke Arabako lautadak

autoan goazen bitartean, zeru apurkorrean ametsak ereinez

eta iluntzeko argi bakoitza edo paisaiaren uhindura leun bat

edo nire eskua zure ahoaren labea desiratuz,

edozein gauza, edozein, izan daiteke gakoa.

Ibilian dabilen eta ihes egiten digun

erdigune aldakorra, non da orain?

Zeren erdian dago bertutea?

Dena mugitzen ari da

eta gu ere burdinezko krisalida likatsu baten antzera

zahartzen ari gara auto barruan,

eta nire buruari esaten diot

nola den posible, nola daitekeen

hain ezdeusa izanik dena

hain garrantzitsua izatea zu niretzat.