UDAKO ZAPARRADA

Aterri dagoen arren

bigarren euri barren bat ariko da

zati batean, zuhaitzetan,

hostorik hosto,

eta bele beltz bat pausatuko da

landa moztu berriaren erdian,

zabaleraren erdigune bakar.

Apurka apurka,

zure baitan bilduko zara

eta zure gogoetan bakartu.

Apurka apurka,

mahaikideak iritsiko dira

—duda, errukia, oroimina—

eta bihotzaren paperezko atea joko dizute.

Mahaikideak, bai, gonbidatu ez dituzun

mahaikideak iritsiko dira

zuk prestatutakoa jatera

eta zuk betetako edalontzietatik edatera.

Banan banan mahaikideak iritsiko dira

—arrangura, poztasuna, nahasmena—

eta, pistola gerrian,

eurekin dantzan egiteko eskatuko dizute.