LEKU HAU

Herri honek ez dauka ezer berezirik.

Inguruko edozein herritan

historia gehiago, eraikin jantziagoak

eta jende jasoagoa aurki daiteke.

Gela honek ere ez dauka ezer berezirik.

Aroztegi bat eta hiru-lau garaje

izkutatzen dituen

kale batera ematen du.

Esaiozu hala ere

ugazabandreari

bertan hartuko dugula ostatu.

Gal dezagun patxada

orain, hemen, batera,

gu bakarrik

eta gu baino ez egoteak

sorrarazten digun

harrotasunaren lurrunean.