UDAGOIENEKO LORRATZA

Ilargia arrankari baten azal gainean,

ibaiaren hondoko harri artean,

eta ur labaina esnea bezala

urjauzirik urjauzi.

Bazterrean hiru gizonen arropak daude

meta bat eginda behe-lainotan.

Noizbehinka intxaur bat erortzen da

eta erorkeran

karraskari baten zarata ateratzen du.

Noizbehinka zuhaitz adarren zurrumurrua

entzuten da, txakur urrunen zaunka,

edo auzuneko portaleetako argien berbaroa.

Zuhaitzen adarren irudi lausoa

uretara erori eta usteldu egiten da.

Haizeak paparra doi-doi bustitzen du bertan.

Ilargia arrankari baten azal gainean

ibaiaren hondoko harri artean,

bazterrean hiru gizonen arropak daude

meta bat eginda behe-lainotan.

Euren biluztasunean badakite

fantasia hutsa dela ikuspen honetatik,

gauaren magaleko izaki eta gauza guztiengandik

jasotzen duten laztan eta harridura.

Noski fantasia dela

bainulariek sentitzen dutena.

Baina ur labainek diotena ulertu barik ere,

gozatu egiten dute

urjauzirik urjauzi.

Ilargia arrankari baten azal gainean

ibaiaren hondoko harri artean,

bazterrean hiru gizonen arropak daude

meta bat eginda behe-lainotan.