Ehiza eta nekea
Igor Estankona

Kutxa, 2004

 

 

MINUTU BAT ZURETZAT

 

Zuk, abeslaria asesinatu duzun horrek,

momentu bakoitza arrakastaz igaro behar den

inbutu distiratsu bat dela sinisten duzun horrek,

zuk, leihoan zauden horrek seme-alabak noiz itzuliko

bidaltzen dituzula uste duzun leku

izugarri horretatik,

zuk, poesiaren hegal negartiak larrosa bat ureztatzearekin

nahasten dituzun emakume ezin ederrago horrek,

ez al duzu uste heriotza eragiteko moduko garaiera duela

inoiz bisitatuko ez duzun koloradoko haitzarte gorriak?

Zuk, bere sorbaldan aurkitzen duzun horrek

sosegu apur bakarra, eta segurtasunak soilik ematen dizun

sosegu hautsontzi bat bezain mikatz horri

zoriona deitzen ikasi duzun horrek,

zuk, berberak, ez al duzu uste ordua dela muino freskoetako

garoa zapal dezazun?

Zuk, balkoiko kordelak izarak eusten dituen besteko graziaz

eta itxura bateko erraztasunaz

sostengatzen dituzun horrek inguratzen zaituzten guztien

okotzetako adurrak, arimetako zulo pisutsuak eta

estimetako mamu gaseosoak,

zuk, isiltasuna arma bizigarri bat bihurtzeraino zorroztu duzun

belusezko zorroztarri horrek,

monumentu bat behar lukeena hiririk urruneneko

parkerik izkutueneko azken xenda bihurrean gauez,

zuk, bai, zuk, ez al duzu uste burua ez dela konejuaren

edo lebatzaren alderdirik gozoena?

Zuk, alfonbra ohore eroriaren orbain hermafroditetatik

izukaitz libratu izan duzun horrek,

etxean argia doanean

zure kontzientziaren azken dirdaiarekin

sakontasun abisaletara jaistea

eragotzi ezin duen horrek,

zuk, belaunaldi guztien uztarria zeneraman bitartean

zure belaunaldiak umeen abizenetan bilduta

abandonatu behar izan dituzun horrek,

inoiz pentsatu al duzu urrietako zein putzutan erori zitzaizun

gida zaitzan alboan behar zenukeen

eta zure aurretik emakume izan zen

behi beltz erraldoi haren irudia?

 

Ehiza eta nekea
Igor Estankona

Kutxa, 2004