ONDARROATIK

Ondarroatik Baionaraino

        irrintzinaren luzea!

Aipatu dute Burgos-ko jaunek

        euskal-gazte bat hiltzea.

Euskaldunentzat gau huntan ez da

        deus mendi eta deus muga:

Otoitz indarka zaintzen baitugu

        denek Arrizabalaga.

Ama guziek seme dute gaur

        Ondarroako gaztea;

Ezin lokartu gaztek dute gaur

        hartaz gau-loa betea.

Erdal-uhainak Euskaldun horri

        oldartu zaizko zafraka:

Euskaraz hura gogor egon da

        zinezko euskal-harroka.

Batzuek omen herraz diote

        odola behar dugula,

Euskal-Herria salba dezaken

        aberrizalen odola.

Odolak ez du, gora diot nik,

        otoitzak duen ahala:

Otoitz-indarrak eginen gaitu

        ezin-hil Kristo bezala.

Ez dute bertzek, erdaldun jaunek

        galduko Euskal-Herria;

Gure baitan da hiltzen gaituen

        erdaratze galgarria.

Baginu denek Andoni horrek

        duen sineste argia,

Ager laiteke guzien gatik

        argi-zabaltze berria.

Andonik badu anai bat fraide;

        biak dena kar dabiltza:

Kristo baitako bien pairuak

        Herria salba dezala.

Gaur Andoni-ren minetik, Jauna,

        har odolaren otoitza;

Jesu-Mari-ren min ixiletik

        har otoitzaren odola.

28-10-69