Choplung herri txikia inguratzen duten mendien malda

malkartsuetan zehar, Noru Dewa mutil gaztea, bere amak

gauean opil ederra egiteko behar duen egurra, batzen ari da.

Eta zuhaitz eta zuhaiska sarrien artean dabilela, gora egiten du

kantua.

Askoz beherago, Choplung herri txikian dagoen Sodyuni neska

gazteak entzuteko moduan egiten du kantu altu Noru Dewa-k.

Bera bakarrik doala aldatz gora, bere kantu zolia luzatzen da

haran sakonean zehar, norbaitek entzuteko moduan.

Eta Sodyuni neska gazteak barre txikiak egingo dituelakoan

dago mutil gaztea, oso mailubi nimiñoak zapi urdin batean

sartzen dituen bitartean.

Ghat herritik hurbil dagoen artasoro eskas batean artoa batzen

ari dela, kantatzen du zoli ere Ang Sandu mutil gazteak.

Gaur gauean bere amak opil ederra egiteko behar duen artoa

batzen ari da.

Eta artoari kantatzen dio eta eskerrak eman Jainkoari, eta lur

honen edertasunak kantatzen ditu, ahots fin hori artalanda

guztietan zehar barreiatuz.

Dudh Kosi erreka handi eta bortitzak ezin du doinu eder hori

isilarazi eta Ihabarma Sodyuni neska gazteak ere entzuten du.

Eta barre txikiak egiten ditu hitz gozoak entzuten dituelako,

eta esku artatsuekin artoa jorratzen irudikatzen du, agian bere

ahoa ferekatuko duen aho zabal hori, bere ahoa musukatuko

duen mailubi koloreko ezpain horiek.

Sodyuni neska gazteak Dudh Kosi erreka bezalakoa dela

pentsatzen du gero, gorago, Phunki Tenga herrian bertan Imja

Khola errekan zabaltzen baita, eta uste du bere amodioa

horrelakoa dela,

bi bailaratan banandua.

                              Namche Bazar, Nepal