Bihar zure urteak dira.

Ezagutzen ez dituzun olatu batzuk harri kolpatuen kontra

lehertuko dira tristeziarik gabe.

Banketxeetako kristaletan islaturik agertuko dira

bihotzak urraturik dauzkaten gazteen aurpegi zailak.

Desorduetan itaunduko didazu berriz norantz

abiatu garen, ez ote gauden hurbilegi.

Oso ilunak diren behelainoek higatuko dituzte

zure etxeko teilatuaren hegi zorrotzak.

Basamortutzat daukadan arimako zulo honetan

loratuko ez diren zure esku urrutiak.

Eta bihar zure urteak izango dira.