Ohartzen baldin bazara, musika horren atzean

beste musika askoren tentakuluak daude,

elkarren artean soinu berriak asmatzen.

Eta ohartuko bazina,

musu guztien gortinaietan leiho askoren ahoak daudela

esango zenidake. Leihoa, munduaren arkitektura banatzen

duena, musurik gabeko ezpain metaliko hori.

Kanpoa eta mihia, zure listuaren kristalak eta paisaia.

Txikitatik gustatu zait leihoetako kristalak apurtzea eta

musikaren atzeko musika hori aditzea.

Ohartzen baldin bazara

musu, leiho eta musikari buruz mintzatzen ari naiz.

Ohartuko bazina zerbait esan beharko zenidake, sikiera

musu leiho edota musikari buruz.