E PUR SI MUOVE

Arrazoi zuen Galileo Galileik mila eta seirehungarren urtean

zioelarik lurra eguzkiaren jiran bira eta bira

dabilela etengabeko ibilian

—egiarik handienak ahopeka esan ohi dira—

Azaleko itxuraren azpian sakoneko egia benetakoa aurkitu zuelako

zuen arrazoi Galileo Galileik, hala diote inkisidore

berriek, Galileoren egia zaharra dogmatzat harturik

inkisidoreek ez baitute Kafka gogoko, ez baitakite

Kafkaz geroztik itxuraren azpikoa azala

bezain azaleko dela.

Ezetz esanen luke Galileo Galileik agian

H.G. Wellsen laguntzaz gure mendera ekarriko bagenu

lurra ez dela eguzkiaren jiran bira eta bira

etengabeko arian ari esanen luke agian.

Ez luke bere ezezkoa ahopeka zertan esanik izanen

Demokraziak ez baitu Ageriko Inkisiziorik

ez du Jainkoaren izenean epaitu eta kondenatzen

Arrazoi Bakarrarenean baizik eta halere

ahopeka esanen luke Galileo Galileik

bere ezezkoa badazpada ere.

Eta tronpaturik dagoela frogatuko lukete argi eta garbi

Arrazoiaren inkisidore berriek prentsa, irrati eta telebistaz,

Galileo Galilei gizarte guztiaren aurrean

barregarri agerterazi beste zigorrik gabe libre utziz

baldintzapeko askatasunean.

Baina guk ez dugu Galileo Galilei

bistarat zigun egia berriarengatik maite

ez eta

egia berria bistaratu zigulako ere.

Lehengo egia zaharrari ezezkoa eman ziolako

maite dugu Galileo Galilei

erakutsi zigulako

behin behineko direla egia guztiak

eta aldian aldiko inkisidoreen aurrean

ezetz esaten ahopetik.