Miraria obratuko den esperantzan

begiratuko du poetak

leihatilatik baina

aspaldian ez da esperantza

funikularrez paseatzen eta

patuaren hari beltzak tiraturik

ez du gorantza doanekoan ere

begiratuko dioten

begirik ikusiko.

«Edertasuna zein den tristea,

poema baten amaierarako»,

idatziko du

bidai txartel zimurtuan

1988-III-28

JOAN-ETORRIKOA

95 pzta

eta hiria deitzen duten

erloju presatuen laberintoan

galduko da isilik

zarata zehaztezinen ataka

zeharkatuz.