Ezagutu nituen portu arrotzak

Hanburg, Amsterdam, Barcelona,

eta diruaren hizkuntza soilik

ulertzen omen duten

klase guztietako putak.

Itsas kolpe traidore batek

galdu ninduela dio

elezaharrak

baina ilargiak daki

besteak bezalako burdel

hartako

besteak ez bezalako

haren

begiratuaren nostalgian

naufragatu nuela

eta nostalgiaren itxasbeheran

mezu hau jaurtitzen dut

itsasgorak atzera berriz

itzultzen didan

etiketarik gabeko

ron botilaren barruan.