Duela hogeitalau mende tximeleta zela

amets egin zuen TXANG TZUk esnatzean

ez zekien

tximeleta zela amets egin zuen gizona

ote zen

edo gizon zela amets egiten ari zen tximeleta.

Hogeitalau mende geroago tximeleta dela

amets egin zuen gizonak esnatzean

ez daki

tximeleta zela amets egin duen gizona

ote den

edo gizon dela amets egiten ari den tximeleta.

Paperezko ametsen atalaiatik

tximeleta direla amets egin duten bi gizonei

erreparatu die Jorge Luis Borgesek

eta badaki

gizon bat bera direla gizon biak

edo

tximeleta biak tximeleta bat bera.

Atalaiako kaiera zabaldu eta

honako ohar hau idatzi du behatzaile itsuak

zorabioen orrialdean:

Gertakari bakar baten errepikapena aski da

historia nahastu eta deuseztatzeko,

historiarik ez dela frogatzeko.