OROIMENAREN ZULOA

 

Oroimenaren zuloa zabala da, zorionez,

egokia da noiz edo noiz

oinaze, kalteen aztarnak gordetzeko,

baina ez da erabat leial eta fidagarria,

batzuetan estaltzen baititu

bizitzaren arrasto zikinak

bakarrik geruza mehe eta fin batez

eta atzaparkada berriek berehala

agerian ezartzen dute

aitzineko samintasun iraunkorra,

etengabeko iturri maltzurraren jarioa,

eta pozak ere,

noizbait antzeman diegun pozak,

ez dira geure burura etortzen

nahi ditugun aldiro,

malenkoniaz jantzitako lainoak

bezalakorik ez bada,

oroimenaren zuloa,

malgu eta traidore,

morroi apetatsu,

eta badira inoiz pentsatu

edo bizi izan ez ditugun oroitzapenak,

unibertsoko kontu zaharrak, alegia,

baina horiek ere berriro

sartzen dira putzu sakon horretara

gaueko mamuak bezala,

eguzki berriarekin batera

izar hautsaren antzera aienatuz,

oroimenaren zuloa,

lagun min gogaikarri,

konplize kutun,

iragan gorroto eta amodioen

gordeleku aparta.