PUTA METAFISIKOA

 

Andre hura zen puta metafisiko bat,

benetan, nolabait erratearren.

Baina, nola azaldu, hitzen bidez,

neuk hain garbi ene baitan

sumatzen dudan irudi aierukor hori?

Ba omen dira poeta metafisikoak,

eta hori uler daiteke noizbait,

eta izan omen ziren filosofoak ere

adjetibo ponpoxo horretaz apainduak,

eta irakur daiteke beren testuren bat

hizkuntza aberasteko asmoz,

fosilak aztertzen diren gisa,

baina posible ote da

bi kontu horiek egiatan elkartzea,

puta eta metafisiko, alegia?

Bai, zergatik ez?

Ulertzen badugu eta noizbait

onartzen ahal badugu ere

berbako politikariak badirela,

olio eta ura irabiatu, nahasi, agitatu eta gero

behin behinean biltzen diren era

ikusten badugu behintzat...

Ongi hornitua zen andre hura,

titiak, aldakak, izterrak, ipurdia,

norberak bere irudimenean aise

emagalduen gainean dituen itxura propioak

bazeuzkan puta metafisiko hark,

eta profesional iaioen ahalbideak ere,

baina ez zuen bere lanean sinesten

edo ez zuen bat ere profesionaltasunik,

sexuarekin zer ikusirik ez duen

etxekoandre etsitua zen hura,

edo bere senarra ez denarekin

andre zintzoak izaten ahal duen

ama galduaren jarrera esistentziala zeukan,

edo oraindik bere gizona denarekin ohantzean

emagalduaren itxura egin nahi ez duen

emazte ondraduarena,

edo isilpeko puta baten antzera

beste senar leial baten bila

dabilen andre temoso dibortziatuarena,

edo emakumeren baten amodio fisikoa

onartzen ez duen gizon batekin lotuta

dagoen lesbiana ezkutuarena,

edo aita desberdinekin seme-alaba anitzen

ama izan den emazte elizkoia izan

eta gizon legalari pazientzia eskatuz

amodioa infinitua dela dioenarena,

edo...

eta ni neu benetako makarra naizela

badakit guzti hau errateagatik

eta oraingoan hori uste dut

tenore hartan puta metafisiko hark

horixe nintzela erran zidanez gero,

eta mundua putetxe haundi bat dela

uste dut ere, baina badaezpada norberak

bere txokoetan gordetzen ditu susmo hauek,

badaezpada,

intimitatea noiz edo noiz bidezkoa bada,

behingoz.