HEREDENTZIA BAT

 

Nire aitarengandik denbora heredatu dut,

denbora neurtzeko era

edo arnasa hartzeko joera,

ez dakit,

baina berarekin ez da gelditu

bizi jario oparoa.

Ez dago iraganik

erloju dotore horretan,

eskuturrean segundoz segundo

aitzina doan orainaldi neketsu bat baizik,

ez dago etorkizunik

gauez distiratsua

den erloju eroso horretan,

noiz geldituko den

orainaldia ez baitakit,

orduan iraganbide argitsu,

itxuren neurgailu itzaltsu,

eta egunak badira,

zenbaki hotzak,

errukigabe aldatzen direnak,

nire aitaren erlojuan

jarraitzen dut bizitzen

bere bihotza gelditu eta gero,

arnasa hartzen dut

berak emandako orduari

arretaz begira,

nire aitaren denbora

heredatu baitut