JAINKOAK GARA

 

Jainkoak gara, baina disimulatu

behar dugu, badaezpada,

eta horrela asmatu ditugu

zenbait izaki arrotz,

denon gainean igoteko

eta jainkoak garelako kulpa

behin eta berriz barkatzeko.

Jainkoak gara betidanik,

baina ezkutatu behar dugu

giza lotsa hori, badaezpada,

natura gehiegi ez haserretzeko

eta disimulatzen ez dutenen aurrean

azalpen umiliagarriak

beti ematen ez egoteko,

hilkorrak garenez

asmatu ditugu jainko hilezkorrak

beldurrari aurre egin,

ezagutzen ez ditugun

hainbeste gauza izendatu

eta nolabait bizirik jarraitzeko,

jainkoak garela disimulatzen

jarraitzen dugun bitartean.