INORK EZ DU HILTZEN BERE BURUA

 

                  Inork ez du hiltzen bere burua

                  emakume baten amodioagatik.

                  Hiltzen dugu geure burua

                  amodio batek, edozein amodiok,

                  geure biluztasunean, miserian,

                  babesgabetasunean, deusezean,

                  errebelatzen gaituelako.

                                        (Cesare Pavese)

 

Edo bizi sobera dugula

erregalatzeko moduan

ulertu dugulako bapatean,

lagunen alde emateko

etsaien aurka borrokatuz,

edo aski dela antzeman, sentitu,

gozatu, pairatu, amets egin duguna

eta nolabait ere jabeak garela,

geure buruaren jabeak bederen,

badakigulako,

eta konbentzio anitzen kontra,

zeru eta infernuaren aurka,

geure bukaera

erabakitzen dugulako,

edo bizia ederra dela

sumatzen dugunez

ez dugu ikusi nahi geure baitan

edertasun hori usteltzen,

pixkanaka pixkanaka,

degradazio errukigabe baten

iragarpen zorrotzaren mehatxupean

eta ausartak gara

geure istorioaren haria mozteko

edo nork daki,

edo.