ORAINGOZ

 

Agian mundu honetan gehien

gorrotatzen dudana maisukeria da,

pedante bezala agerian jartzen den

morroi nazkante baten jokaera,

maisutasunik gabeko dilettantea,

maisu bezala mintzatzen den txoriburua,

ezin baina jasan adimenari egindako

hain iruzur handi hori,

lotsarik gabe giza esistentzian eta naturan

ematen diren kontu guztiez

solas eta solas egitea

lehen egia berak aurkitua bailitzan;

pedante nazkante horren jarrerak

liluratuak zituen ene auzokoak

edo itxura gordin hori bederen

agertzen zuten bere aurrean,

baina behin lagun zorrotz bat

ausartu egin zen morroiari erratera

egiatan pentsatzen zuena, alegia,

txirriporro huts bat zela

eta sasimaisua sasikumetzat

hartu zuten eztabaida zakar hartan,

edo hala iruditu zitzaidan behinik behin;

baina gaur ikusi dut morroi ernea

hain lasai, auzoko lagunen artean,

bere mintzaldi hitzontzia berriro egiten

eta sumatu dut aurkitua neukan egia

nere susmoa zela eta neurea soilik,

oraingoz.