Amaigabeko zikloa
Joakin Balentzia

Kutxa, 1995

 

 

EROMENAREN INGURUAN

 

Eromena da gauza ez izatea,

errealitate gehiegi pairatzeko gauza ez izatea.

 

Eromena da ezgauza izatea,

ametsak efikaz bihurtzeko ezgauza

edo biziaren seriotasuna jasatzeko ezgauza izatea,

ilusioak ipuin eder batera itzultzeko gauza ez izatea

edo eta ilusioak errepresentatzeko beste itxura,

gaur onartuta ohi ez den giza konbentzio zaharra,

zuhurrik ez delako ametsa.

 

Eromena da poesia egiteko modu zorrotza,

serioegi bihurtzen den pasioa,

estetiko bezala onartzen ez den zintzotasuna,

egia hutsa baita eromena.

 

Eromena da gauza bihurtzearen aitzineko beldurra

eta egun kanpoko kimika erabiltzen da gehienbat,

modu burugabe batez,

benetako giza aztura hori menperatzekotan,

baina egiazko erokeria da sendatzeko grina hori,

itsasoaren harrotasuna konjuroz mugatzeko

nahia bezalakoa,

edo gizakumeen errebeldia botikaz apaltzeko

asmo asasinoa.

 

Eromena da isiltasuna

edo isilik gehiago jasan ezin duen

garrasi eder eta erlatsa.

 

Amaigabeko zikloa
Joakin Balentzia

Kutxa, 1995