KONPLIZITATEA

 

Hostoen konplizitatea dut baso honetan,

kamutsa dut inspirazioa tenore honetan

eta ezin dut segi bide horretatik

oraingoan.

Bularrak ditu mojak ere

eta medikuarengana doa

aztertzera

ea minbizia duen

nahiz amak bezala

nahiz amoranteak bezala

ez erabili eta gero.

Oso mugatua da gure amodioa,

ezin gara komunikatu

nahi dugunaino,

ezta pentsatu ere,

baina zer edo zer

saiatzen gara egiten

eta zenbait une gozo

baditugu nonbait eta ilusioa,

bizi garelako ilusio zaharra.

Bitartean jan ta lo egiten dugu,

ahal badugu behintzat,

eta ametsak baditugu

inoiz beteko ez diren ametsak

eguzkiari begira

sute itzela noiz izanen zain.