PULVIS ES...

Auts zaralako austuko zara;

egi au ondo gogaldu

Auts egunean Ama Eleizak

kistar orori diñosku.

Egi au        zarra oso dala be,

beti da barri-barria

itxaropena kistar onentzat

txarrentzat bildurgarria.

Arrokerizko axez biotza

gustiz dozuna puztuta,

danak menpean euki nai dozuz

egi onegaz aztuta?

Buruan autsa ezarri eta

Ama Eleizak diñotzu:

Auts zaralako austuko zara;

gizon arroa, gogaldu.

Aberastasun ugaltasunak

biotza dautzu dollortu?

geide gaxoai sorositeko

errukibako biurtu?

Entzun Amaren egi sakona

eta biotza samurtu:

Auts zaralako austuko zara;

gizon dollorra gogaldu.

Lizunkerizko ekandu txarrez

biotza dozu lotuta?

beti lurrera begira zagoz

Yaungoikoagaz aztuta?

Entzun Amaren egi garratza

eta biotza goratu:

Auts zaralako austuko zara;

gizon lizuna gogaldu.

Doipuru ala Bakaldun izan

yakinge nai yakintsua,

txiro gaxorik bizi dan ala

aberats osasuntsua;

entzun gustiok egi garbi au,

Eleizak oroi diñosku:

Auts zaralako austuko zara;

egi au, gizon, gogaldu.