ZAIN HAUEN HOTS BELTZEK

 

   Zain hauen hots beltzek

herriari lotzen naute,

Euskal Herri harrigarri

honen zilbor sekulako,

                     kosmiko

                     beraldikoari.

 

                 Ni naizen eta gu garen hotsa

               haren sabeleko uretan

               itota,

               —zein itsasoa

                   putzu nolakoa!—,

               bere uretan, arnasetan

               gaude murgilduta,

               ardo bortitz-loditan

               zeharo mozkortuta.

 

               Euskaldunok,

               historiaren ritmoan

               zigor garenok,

               ama horren sabelean

               gure asmoen goldean

               —nolako zakila

                  ta lurra—

               ari gara (inor harri ez dadila)

               zula ta zula.

 

                   Semea amari lotu ohi zaio

               izadi sakonaren, emankorraren

               grinazko misterio...

               bai, semea amari

               eta gu Euskal Herriari.

 

   Herri honen oihanak eta mendiak,

herri honen kateak eta burdinak,

herri honen hibaiak eta grinak,

herri honen dantza ta saminak

eta bere libertate oinazeak

                         —gureak

                            nireak—

beti izanen dirade

                                     harrigarriak.

 

Ama horren sabel mahatsezkoan

                   —saratsezkoan

                   sekulakoan—

sartuko dira berriro

—gauak egun askatua duenean—

euskal seme galdu, atzeratu,

herbesteratu guztiak.

 

              Ama horren zainetan

           —ezen erreka mantsoa nolan—

           beheruntz arnas bizkorren hibaia,

           asmo bortitzen ardoa,

           gure borroken sendoa.

           Eta inork ez du agortuko

           ama horren sabelpeko zuloa,

           inork ez edango herri honen odola,

           inork ez kateatuko seme hauen gogoa,

           inork ez zanpatuko gehiago

                                   herri honen zangoa,

inork ez, inork ez

gure mailuaren ekinez...!

 

1974