DESIRAK URAK BEZALA

 

                    Desirak urak bezala

                                              dihoazkit

                hemen barrendik

                                              dihoazkit

                hondarraren eran,

                nola ur gordina eskutan

                halako nahasketa pilatu ta

                altzairu gogorretan.

 

Mendiak danborraren gorrotoaz

mugitzen ziren,

anaien arteko borrokak eta iraulpenak

kontrajartzen ziren,

elkar amorrotan ziren,

desiraren bular gordinak

—neskatxaren sagar bizkorrak—

grinapetik (jerseypetik) eskaintzen,

azaltzen ziren.

 

Ustegabean uztartu ziren

—bolkanaren su gailen—

desira nabarrak eta gorputzak,

haragi hedatu ta grinak,

antsi baten oinazeak

istant goiaren burdin-azufreak,

eta ordu luzeen besoetan

ertz guztiak tente jarri ziren

aldi hura goza nahian...

 

Harrezkeroz

borroka ezingabekotan

maitemindu zorrotzak ginen

elkar zulatu nahian

elkarren jabe

izan zale,

ez dakit nongo ozeanotan

halako ohe zabaletan,

ez dakit nongo, noizko, nonbaiteko ozeanotan...

 

1973