Alegi hauek ez dute moralik

gauerdian, elizdorreko ezkila jotzean,

uhuriaka hasten naiz ilargiari begira

zeruko ganga itzela da une horretan, eskuraezina

ikasbidez beteriko liburuek ez didate oraindik eman

hainbesteko grinaz bilatzen dudan erantzuna

 

seaskan kondatzen zizkidaten ipuinak

nahiaren lurrinaz apainduta, ekartzen ditut gogora

baina ez dut ahaztu behar

mendi hegaletan biluzik nabilela bidez bide

egunez, eguzkiaz eta

gauez, argizaiolaren argiaz

 

neri ere, bukaerarik gabeko bidai honetan

zenbait hariztiren artean

edo pagadietako itzaletan

askatasunaren kondaira ari zait kontu kontari

behin eta berriz

orbelaren erorketa bertikala galerazten duen haizea

eta neregan zerbaitek dio:

esna hadi, esna, ipuin sasiatseginkor horiek alboratu eta

ulertzen has hadiI