Itsasoetatik urrun

ibaietatik gora

ari dira dantzan ululariak uluka

 

beren gorputz hegalariek, aldizka,

basoaren agerruneko iluntasun haragigabetuan

iraganeko arrastiriak dakarzkidate gogora

eta zentzumenaren azal atsegina goxoki laztantzen ninduen

kobazuloetako urjauzien

doinua

 

une horretan

emaztekien intziri lizunek ekaitzak sortzen dituzte

eta mendi gailur maldatsuenetan

ilargi astroari

edertasuna ebasten diote

           hortik asago

           itsaslapurrek

gantzu eta sendagailu pozointsuak edaten

ematen dute eguna

 

hainbat lanen ondoren

itzulezinaren itzala nagusitzen zaien arren

haragiaren aberrira bidaiatu nahiko lukete

sasi eta hodeien artean eragindako loak hartuak

hala ere

azken eurijasaren egun zurbila hurko baitute

ez zaie inoiz iristen eguna

 

baina balizko erresuma boreal hartarako bidean

—ez badira ezabatuak kausitzen garaia baino lehen—

inpresio zahar

amets helezinak

eta ortzearen azpian ezagututako paisaia lainotuek

beste egun berri bat bizitzeko haina indar ematen diete