Eguzkiaren errainuak erortzen dira

Alexandrian

Sienan (Assuan) edo beste latitudetan

baino kadentzia astitsuagoan

itzalak luzeagoak dira orduan

 

udako solstizio lehorketaria suertatzen den egunean

eki izpiak pisuz pisu, bertikalki, jausten dira Assuanen

horregatik,

esklabuek uzta jasotzen duten orenean,

hekatonbe ikaragarriak zeruetara jasotzen dituzte

jainko mendekatzaileen omenez

eta eskuekin begiei itzala emanez

kiskaltzen gaituen urrezko astro erregeari so egiten diote

 

bitartean,

Alexandrian,

liburutegia hutsik dago

gizonak lotan ari dira palmondoen azpian

emakumeak ibaietan igerika dabiltza

eta badago, halaber, haur-koru bat

eta beren ahots kantariez

udaren aro berriaren hasierari

agurra ematen diote