Ibilbide sideraletako gauen baretasunean

egitur galaktikoen izarrak

itzulika dabiltza

gertagaitzezko erdialde baten inguruan

 

mila miloika parsek baino gehiagoko tamainetarantz abiaturik

esne antzeko multzoak

izar lurrunak

gainditu behar dituzte

ohiturak elikatzen duen bidai honek aurrera egin dezan

 

honela, mundua sortu zenetik gero,

lerro magnetiko eta pigmentazio gorrixken amildegietan erori

eta anabasa sailkatzen duenaren on eritziaz,

izar hautsezko gunetan sartzen dira

indar dinamikoak sortuz

atomoak

diametro infinitesimalak

 

gauaren iluna, mendez mende,

beztu eta estali ohi da era berean

 

zenbait teleskopio indartsuk,

halere,

ageriko magnitude urrunen egoera puntukaria

nabaritu dute ezerezaren lekutako ertzeetan:

milaka argi-urtetara, orbitarik gabeko ostondo irekietan,

eguzkiaren ingurutik at bizi diren izar dardartiak

 

izarbide exzentrikozko astro etxegabeak

            moldagaitzak

            jazarriak

zeru horretako ortzemugetan batzen dira

eta geriza eman behar baitiote elkarri

laino mineralezko aterpe sendoak eraikitzen dituzte

ixileko eremu askeak

ahanzturatik,

maitegabeziatik iheslari doazen izar arin erratuentzat

 

ahal baneza,

mugalde haietara bidaiatu nahiko nuke

oxigeno falta ikaragarriak sortzen duen itotasunari

eta Orionen ezpataren ahoak kudeatzen duen huts

eta garraztasunari kateatua

kutsatua ikusten baitut,

izartegi ixtikari honetan,

neure burua