Tebas eta Meris lakuko lurretan

gizabanakoaren askatasuna

gogo zanpatuen gorputz-independentzia alegia

bereziki sakratua izan ohi zen faraoi haundien garaian

 

oinarrizko bizilege hau

Niloko kokodriloek zaintzen zuten fierki

horregatik maitatuak izateaz gainera

urruneko probintzi haietako biztanleek gurtuak izaten ziren

 

gaur,

gaua izarratua dagoenean,

ezin dut lorik egin

eta gezur harrotu guztiak gainditurik

mendi gailurretan bizitzera ohitu ez naizenez

ibai aske haietara itzuli nahiko nuke berriro

 

irakaspenaren sakontasuna

eta honen indarraren distira argiak izan arren

ondoko gizon eta emakumeen arimetan

izpirituan

haien gorputz lehorrei darien energian

zeihardura tamalgarriak sumatzen ditut gau likits guztietan

 

eta eskuekin urratu nahiko nituzke begiak

eta liluratik urrun

hortzez ausiki egiten dut burukoa amorru guztiaz