Garraren eta karroiaren margoak
Juan Karlos Lopez Mugartza

Euskaltzaindia / BBK, 1994

 

 

Airean egin nituen gazteluek

ankerki solas egin zidaten

urdintasunaren handian ito eta gero

nitrato organikozko ongarri bihurturik

txarkeria eta grina bajuenak

begi bekaiztien desira

eta amodiozko besarkadaren berotik urrun

giza saldo amorratuaren zorne zurbila

txingarren artean kukubilkaturik

sumatu nituen gaua iritsi zitzaidanean

 

halere, bakarminean bizitutako denbora luzearengatik

loalditik esnatu nahiko nuke

eta hatzaparkatu nere azal geziztatua

 

jasandako zigorrak naharoak izan diren arren

balizko garizelaietan bildu ditudan ale bakanek

jakintzaren zitua erakutsi eta, zagitariek,

zientzia guztien sekretuak azaldu nahi dizkidate

etengabeki eraldatzen ari den eter itxuragabean

 

olatuen apar distiratsuek isuri dituzte errekak

eta sare lazgarrietatik, uraren oxigenoak jasoak,

ihesari emandako arrainen jira bira alaiak dakuskidalarik

ezbizia, betirako, bizitzarekin kateatu dela onartzen dut

 

Garraren eta karroiaren margoak
Juan Karlos Lopez Mugartza

Euskaltzaindia / BBK, 1994