Just love
Itxaro Borda

Maiatz, Uhargi 13, 1988ko abendua

 

ZORION

 

hiri handiko eguzki sartze malenkoniko

arrats amnesiko honen

ondarkin etilikoak itzazu

ithakara itzuliko garen

esperantzaz

 

hego haize arrosak altxatuko dira bihar

itsas penatuen uhainak

kanta araziz etsiduraz bortxatu

untziak orainen leihorrean hausten

diren artean

 

ibaiaz bestaldetikan ilargitxo loditzen

doa amodio behar gorriaren

sarraskiak ehaindu nahian auhaltzeko

tenorea etorri ote zaigu ithakako

bide landerosean

 

eta nere bila airatuko zara urtxo maitea

ugartez ugarte nonbait estekan

aurkituko nauzulako segurrantzarekin

hegal bien suan burdin elkorra

malgotuko duzu

 

egun batean ondorioz herriko bruma arinei

amets egitearen indarraz

askatasunez eraikiko dugun ithaka

berriko gazteluan biziko

gara zoriontsu,

 

eremu orlegiei so ...

 

 

Just love
Itxaro Borda

Maiatz, Uhargi 13, 1988ko abendua