Just love
Itxaro Borda

Maiatz, Uhargi 13, 1988ko abendua

 

KOPLAK

 

begiak bete negarrez

harri ustelak belarrez

flipatzen diat azkarki

herritik joan beharrez

 

arto horailen kemena

haizeak irensten dena

trenean urtzean zaidak

zintzurrean hazten pena

 

euri nagi eta mentsak

dakarzki elur amentsak

ezpain hotz minduetako

ikaren daldara kentzak

 

zeru grisek hatsa galdu

kolera nonbait azaldu

maiz ditiat debaldetan

esperantz loreak saldu

 

itsas motelak izerdi

hurbilduko da gauerdi

ainarek har ditzaztela

amorezko lau hitzerdi

 

karrasien hil zorian

itzuliko nauk lorian

pausatzeko ondarrean

hil apailatu hobian

 

 

Just love
Itxaro Borda

Maiatz, Uhargi 13, 1988ko abendua