Just love
Itxaro Borda

Maiatz, Uhargi 13, 1988ko abendua

 

PACEM IN LAPURDUM

 

 

                I

 

gaztelu zahar blues.

ahoak oihal trikolorez tapaturik.

hiri aberatseko karriketan barna.

larunbat arratsaldez.

        beti eskatzen.

        beti kolpeak biltzen.

urdin beltzez jantzirik dabiltzan

orden zaintzale harmatuak,

        gaz negar ekarleak

        erromesak gu gara.

xuri garrailez apaindu burgesen

komentario zorrotz zuzenak,

        hau ez da Libania

        hots demokrataka.

gorriegi ixurtzen da matrakaz

jo kidearen kopetatik odola.

        giza eskubideak.

        Soweton menturaz.

pasatzen dira manifestalariak.

gaztelu zahar plazako ehun eroak.

banderola higatuen gibelean.

larunbat arratsaldez.

        beti eskatzen:

        kanporatzerik ez!

        beti eskatzen:

        presoak etxera!

        beti kolpeak biltzen.

zubi gainean korrika.

lurrean eroriak batzuk

        ba ahal dago medikurik?

detenituak barreiatuak hatsantuak.

poliziek gero

clausewitzen gerla taktikak segituz

ghettoa inguratzen dute. frantses bandera haizean.

 

pacem in lapurdum.

 

 

                II

 

KONTROLA

nortasun agiria

eskuak gora

nondik nora hoa

ze lanbide

non bizi

frantsesa ahal haiz

zergatik hemen hago

gauez

bakarrik

karrika honen erdian

zer daukan sakuan

bonba bat agian

eskuak gora

eta liburu horiek

propaganda ote

zinezko tabakoa

zergatik hemen hago

gauez

bakarrik

ate honetan joka

KONTROLA

 

 

                III

 

burgesek beren bordel hustuen zaintzeko

hargin munizipalei

ahalgearen hormak altxa arazten dituzte.

 

ordena eta zimenta.

 

squatt board blues.

 

 

                IV

 

demokratikoki eta gehiengo osoaren arabera

herriak hautatu

kazike baten egoitzatik bestera ibiliko gara

luzaz

diru eske.

 

aurten defentsa nazionalaren buxeta

ehuneko berrogeiez emendatu da.

        hogei ta hamalau miliar

        urpeko mizil nuklearrentzat,

        hiru ehun eta larrogeita hamazazpi miliar

        awacs iankitarren erosteko,

        bizpahiru miliar armada modernizatzeko.

 

demokratikoki eta gehiengo osoaren arabera.

 

eta gu

urtetik urtera

kazike baten egoitzatik bestera ibiltzen gara

hamar milioi ttikiren eske,

        demokratikoki

        (poliziez setiaturik)

        guttiengo xoilaren

        errebendikazio oinarrizkoak

        plazaratuz.

 

Paribas bankoaren pribatizazioneak

larrogei miliar ekarri ditu

gobernu eskundarreko ministroei.

 

demokratikoki eta gehiengo osoaren arabera.

 

 

Just love
Itxaro Borda

Maiatz, Uhargi 13, 1988ko abendua