Just love
Itxaro Borda

Maiatz, Uhargi 13, 1988ko abendua

 

SEASKA KANTA I

 

harri lehor arteko arros uhargiak

loratuko direnean

uda minetako euri epelek

duzun bihotz ttikia

usanduko dute,

      loak har zaitzala

      pottolotxo

      loak har zaitzala.

 

ibar orlegietan barna haizeak

ezti gosez dauden begi trebeak

bidegabeko berezte latzaz

mendekatuko ditu,

      loak har zaitzala

      pottolotxo

      loak har zaitzala.

 

lotsa mutuak mugatzen duen iparreko

bakardadearen zelai gaizkunduetan

gerla orrantzez loditu hodeiak

urruntzen sumatzen dira,

      loak har zaitzala

      pottolotxo

      loak har zaitzala.

 

erreka antzuen altzo zaurituak

behin betiko

haur baten irriaz oroituz

sendatzen ditezke.

are gehiago ihardokitzeko indarra

hurbil nahiaren ortzaizean

nonbait aurkitzen dute,

      loak har zaitzala

      pottolotxo

      loak har zaitzala.

 

      loak har zaitzala

bihar irabaziko baitugu ...

 

 

Just love
Itxaro Borda

Maiatz, Uhargi 13, 1988ko abendua