Just love
Itxaro Borda

Maiatz, Uhargi 13, 1988ko abendua

 

RIAU RIAU

 

maitea begira ilargi borobil horren irriak

nafarroako hiri nagusiraino

hegaldatzen nau.

haizearen usain urdinak zainak maitea

errausten dizkit eta agudo

izpiritu larri bihurtzen naiz

nafarroako hiri nagusiraino maitea.

 

maitea begira lagun tematsuak asmatzen ditut

herri nahiaren izerdi gorria kopetan

karriketan zehar dantzan.

ertaroko hariztien itzalean gero maitea

ikara hotzek haragia zauritu arte

odolaren mirailean larrua jotzen

nafarroako hiri nagusiraino maitea.

 

maitea helas negarrez lehertzen naiz antsiz

zure bular legunen kontra

bakardadearen harroketan bezala.

pobre de mi naufragatua beso desiratuetan

utz nezazu gaurkoan amodio

herbailen loan atseden hartzen

nafarroako hiri nagusiraino maitea.

 

 

Just love
Itxaro Borda

Maiatz, Uhargi 13, 1988ko abendua