Just love
Itxaro Borda

Maiatz, Uhargi 13, 1988ko abendua

 

O.P.A.

 

inbeztitzaile klubaren biltzar nagusietan

parte hartzen zuten bihotz gogorrek

pribatizatu akzione merkeak erosteko

erabakiaren finkatzeko

irailaren zortziko krash egun beltzean

dena galdu baitzenuen

zu amodio joanen zama estimatzen

saiatzen zinen

eta ez zegokeen ekonomiako ministrorik

zure desastrearen balorisatzeko

dena galdu baitzenuen

 

irailaren zortziko krash egun beltzean

ekilibrio lortu berriaren begiak

zilatu zizkizuten

josi gabean utzi bigarren aldikoz

moztu haragi motela

lurrak berak bekaizti zure malko hutsak

ez zituen onhartzen

eta ahizpa kaiertzean

dena galdu baitzenuen

kaseta nazionaletan minaren kotazioneak

goizero aztertzen zenituen metroan

eta ahizpa kaiertzean

dena galdu baitzenuen

o kontsolamentum

 

askatasun zain dagoen herriko iraganaren

trukean

menturazko geroaren obligazionea eskaini

zizuten

with or without you kantatzen zenuen

eskua bularretan pausatuz

titi ausikitik esne uhargia oraino ixurtzen

zitzaizun bitartean

dena galdu baitzenuen

eta ahizpa kaiertzean

 

 

Just love
Itxaro Borda

Maiatz, Uhargi 13, 1988ko abendua