Just love
Itxaro Borda

Maiatz, Uhargi 13, 1988ko abendua

 

O SAUDADE

 

itsas txoriak

kanaletako ur beltzetan mainatzen

ziren orduan

ezpainetan hitz arrotzak zeuzkaten

jende presatuen artean

ibiltzen ginen

eskuak sakeletan.

centraal stationen

tramwaya hartzen genuen

rembrandten margo argigabeen

miresteko.

iparreko lanbro finaren pean

gero

diamanteroen auzoa zeharkatuz

warmoesstraaten sex shopen aintzinean

gelditzen ginen

plastikozko zakil malgoen balioa

preziatzearren.

bob marley rasta coffe tabernetan.

karrika ezkin orotan

hash coke speed proposatzen ziguten

indonesiar dealer'ek.

achter burg waleko bitrina gorrien

gibelean

asiatik etorri emakume biluziek

ipurdi oparoak pasaiantei

ehun guildenetan merke

eskaintzen zituzten.

fernando pessoa aipatzen genuen

brazilgo fortunazko kideekin.

gauaren erdian venceremos oihukatuz

separatzen ginen.

leidespleingo ostatu iluminatuetan

garagardoak pintaka edaten genituen

malko traidoreen hezteko.

eta goizeko lauak aldera

portuko sailor's barrean

azken kanta bat botatzen genuen

herrimin nekatuari hildoa irekiz.

                                    o saudade ...

 

 

Just love
Itxaro Borda

Maiatz, Uhargi 13, 1988ko abendua