Just love
Itxaro Borda

Maiatz, Uhargi 13, 1988ko abendua

 

miseriaren urrin segitzale bortitzegia sumatu dizutelako

a priori zapaldu galtzaleen zerrendan jartzen zaituztelako

hemengo karrika oparoen bazterrak hormak zuritzen

                                                                dituelako

laneko kolegak kontzientzi on errezez hantuak direlako

haurra altzoan supazterrean berotzeko gutizia daukazulako

              metroan urtu nahiko zenuke

              negarrak menperatzen saiatuz

 

rush orduetako jende anonimoekilako kontaktu fisikoak

gohaindura ikaragarria emendatzen dizunean

egunero jateko eta urtean zehar produkzionea segurtatzeko

doia ordaintzen zaituztenean

bakarrik bazkaltzen zarenean

larderiaz hurbiltzen zaizkizunean

eztitasun aintzirak eskas dituzunean

              metroan urtu nahiko zenuke

              negarrak menperatzen saiatuz

 

              bapatean eskale zango motzak

              jotzen duen akordeoi soinuak

              herriko trikitix bozkariotsuak

              gogoratzen dizkizu

 

              bihar ere argituko duela diozu

 

 

Just love
Itxaro Borda

Maiatz, Uhargi 13, 1988ko abendua