Just love
Itxaro Borda

Maiatz, Uhargi 13, 1988ko abendua

 

KANTUTEGI URRATUA

 

 

                1.

 

frigoan bierra freskoa hartzen huen

eta ohe gainean luzadan etzaten

hintzen kolerak hire errai astinduak

koropilatzen zituenean

herri galduaren kantutegi urratua

abots hilez errepasatzen saiatuz

      «nik zu zaitut maiteago ...»

 

 

                2.

 

goxoki arros sukratuen usaina dute

azken euriek

udaberri datorrenaren eskaintza oparoek

bihotz malgoa bezala

teilatuetan joka ari da ur ttantta nagia

euria,

oraindik ez diet erran.

 

 

                3.

 

gu historia ofizialik gabeko populua gara

eta deusek ez ditu gure gaurko ekintzak

justifikatuko.

estado zentralistaren aitatasun eztiaz

baliatzen jakin ez dugunak geldituko

gara betiko ments.

 

 

                4.

 

kantauri ertzeko arkaitzetan uhainak

kaioekin jostetan

mediterranear lur lehorretan lavanden

erdian hazten loreak

eta ainarak, o ainarak, iparreko harpe

erraldoietan

larrazkeneko migrazioen haiduru.

 

 

                5.

 

o laztana ba ote dakizu non dauden

amilduak gure gaztaroko esperantzak?

zergatik mozten dizkiguten mihiak

zangoak bularrak besoak behatzak?

nola itsutu gaituzten?

noiz itzuliko diren berriro urtxoak

zure zein nere ahurrean asetzera?

 

 

                6.

 

mendietan harri zorrotzak bilduko ditugu

esku hutsik ibili garenok

eta heriotza

hiriko barrikaden atzetik

bonbardeatuko dugu

udaberrian.

 

 

Just love
Itxaro Borda

Maiatz, Uhargi 13, 1988ko abendua