Just love
Itxaro Borda

Maiatz, Uhargi 13, 1988ko abendua

 

AHIZPAREN NEGARRAK

 

urtzo gris ausartak katedraleko ezkinetan

harri okreen bihurretan

gordetzen jostatzen ziren bitartean

ahizparen ezpainetan etsiduraren plegua

hedatzen

sumatzen nuen

 

ertaroko piztiek larunbat arratsaldeetan

buru lerdenak altxatzen

zituzten kantu polifonikoen melodia

urdin kartzelatuekin batera

ahizparen begietan euri gutizi minbera

luzatzen

irakurtzen nuen

 

zuzengabeko eraso hainbatek gure hirietan

marrazkitu erreprezionearen

geografia intimoaren arroiletan barna

ahizparen eskuetan maiatzeko haizeen loa

trenputxartzen

nabaditzen nuen

 

          eta nion, mintza hakio:

eguzkiaren gaurko bideak ez duela gelditzerik

txori migratzaileak noizbait direla itzultzen

udaberria beti usain gozoz hanturik datorrela

bihotza larrutzen diguten ikarak laster emetu

behar zaizkigula

          erraion, mintza hakio

 

          erreprezionearen geografiako

kaletan barna ahizparen negar gordeak baino

          latzagorik ez baita.

 

 

Just love
Itxaro Borda

Maiatz, Uhargi 13, 1988ko abendua