Just love
Itxaro Borda

Maiatz, Uhargi 13, 1988ko abendua

 

TOLBIAC XIII

 

gaztelu zaharrak artoz erein lurraldeak zaintzen zituela

osabaren ehorzketa umiletan jendetza errendatuan galdua

bearnoko eliza ttiki batean negar gutiziak hartu hinduen

eta orroitzen haiz behin bilboko zabalburu plazan orduak

beha egonik zigarroak erre ahala erre aritzen hintzela.

 

ebaki hitzaren erran nahi zehatza bilatzen huen liburuan

hire gaitzaren oinarria definitzeko asmoz iragan hautsia

zangopilatzen zitzaunaten bitartean administrazioko soto

ilunetan gogoratzen haizea ikastolen aldeko manifatikan

landa laguna deitu behar huela restaurantean auhaltzeko?

 

zenbait aste lehenago agian ikaragarriko elurrek errekak

estali zitiztenan bihotzak astinduz edo urratsak motelduz

ez huen gehiago sahetsean nehor ere suportatzen alta bai

amodio errezak imaginatzen hituen bi mozkorraldi hotzek

hedatu eremu urratuetan azken apailaketak ixilik hastean.

 

hilerrira heltzean ainarak hegalak zabal kantuz entzuten

hituen hion laster arto bihi onduz aseko dira itzultzea

egunero zeruan itxuratzen diguten xoriak malkotsak zipre

arbolaren erroek jan zizkitenan poesiak idatzi urgentzia

atsolutoaren arabera larderiapean ihardokitzen jarraituz.

 

haurrez mendi kaskoraino joanik hegazti bihurtzea amesten

huen aintzira disdiratsuak ibai gardenak airetik ikusteko

herriko eskolako biblioteka hurriko obretan mila kolorez

apaindurik miretsi gauzak oro baina luzeki atxiki hinduten

mugan zakurrekin kotxea goitik behera miatu ziatenanean.

 

auzo hurbileko amonaren irria heriotz ohantzean etzanik

begiraturik amultsuki egunerokotasun dorpe zein latzean

zehar kopetan ixuri izerdi perla uhargiak zerrendatzean

iduritzen zitzainan aberriko giroan giza harreman xoilak

barbaritatearen labakietan landatuak izan zirela betitik.

 

aldizkari oparoetan aztertzen zuten post modernismoaren

imigrante dudakorra hintzen iratzeen murmurioz eta umeen

gozotasunez esperantzetan hantu hizkuntzan pentsatzen ooo

huen karrika argitsuetan barna leku orotan arrotz baten

gisara konportatuz zazpigarren belaunaldiko herrestakina.

 

udarako arratsalde apaletan ogi zelaiak joiten zitiztenan

eguzki sartzeak kantabriako kostak odolez janzten zituen

aspaldiko borroka okrearen seinale sarraskitua bailitzan

hi urrunduz geroztik laborari batek burua etxeko teilatuan

lotu zinan bestea araneko urtegi meharrean itotzen zenean.

 

nork iraun dezake heriotzak eskualde guzietarik setiatzen

duen erreinuan ? nola ezti ditezke gorputz mutilatuak jasan

labankada akulturzaleak? noiz sendatuko ditugu suaz husten

doazkigun gure esku ahurrak ? bazekin jakin abesti minkarra

arbasoen ordoki kuttuneko izaizko kutxetan eskainiko dunala.

 

hori dena konta hezakeen tabernan parrean jarri kolegari

metroaren edo maitasunaren haiduru zinaudetela maiz bezala

bierra epelak edaten paco herrera de la manchan kartzelan

hotel monbar laztanduko haut hire larrua itsas orlegiaren

gaziaz beltzatuko zaikanean aitortzeko eskapatzeko zorian.

 

 

Just love
Itxaro Borda

Maiatz, Uhargi 13, 1988ko abendua