Just love
Itxaro Borda

Maiatz, Uhargi 13, 1988ko abendua

 

SEASKA KANTA II

 

beso bilduen magal eskainian

pausatuz burua

egizu lo lasai.

iraultza desiratuko bidea

zilatuko duen utopia larriaren

argi zurpailak

biharko zerua urdinduko du.

egizu lo lasai.

hezur higatuen hauts grisek

koloreztatu uhain bipiletan barna

doan atseden untziaren branka

tinko atxikiko dut.

hego haizeak

itsas ainaren murmurioak

mundu osoan

zabalduko ditu.

egizu lo lasai.

eta noiztenka

maiteko zaitudala ahapez

errepikatuko dizut.

ortzaizean

biharamonaren ugarte bakartienaren

itzal arrosa marrazten

ikusiko dudanean

iratzar araziko zaitut.

egizu lo lasai.

anartean

solasen barbaritate krudelak

zauri dezakeen

gauaren hiltzerainoko eremuaren

mugetan

zain egongo naiz

zilarrezko ezpata eskuan.

 

egizu lo lasai.

 

 

Just love
Itxaro Borda

Maiatz, Uhargi 13, 1988ko abendua