LX.garren OTOITZ-GAIA

PILATOSEN, TA JUDATARREN,
BI JARDUKI ALDITAN
GURE JESUSEK EKUSTEN DUENA

A.

Agertzen die judutarrei
Jesus Pilatosek era guztiz urrikalgarrian;
ta itz egiten die onen alde; baña alferrik

        Pilatosek ekusi zuenean, Jesus maitagarriarekin soldadutzarrak egin izandu zutena, illundu zitzaion bere biotz barren guzia; ta berari iduriturik, era artan Jesus ekusi ezkero, berebat gertatuko zitzaiela judatar gogorrei: ta orien gertaer au ekusi naiez, agertu zen beren begietan Pilatos jueza; ta agertu zen an Jesus urrikalgarria bere ondoren zeramala.— Begiratzen die bada Pilatosek judatar guziei; ta zegoen era urrikalgarrian Jesus agertzen diela, erraten die Pilatosek: Ona non dakardan, ta ona zer eran, ta zer itxuran onako zuen gizon au; ekus dezazuen zuek, ez dudala nik obendun arkitzen au, zuek eskatzen dezutena nik onekin egiteko.

        Pilatosek Jesus au oriei agertu zienean, arkitzen zen Jesus maitagarria erdi-agerian, zauriz, edo eridaz zen guzia guztiz betea; ta odoletan sartua zirudiela, odola odolaren gain zeriola; olaltzar gorri irrigarri bat lepotik zuela; ta bere buru minberean arantz zorrotzezko koro izugarri bat agitz sarturik zeramala.— Eskuak loturik eramain zituen Jesus maitagarriak, presondegiko gizonak bezala; ta eskuan eramain zuen soldaduak irriz ezarri zioten kañabera.

        Begietatik aterako ziozkaten agian Jesus maitagarriari zenbait negar-malko, bere buruan sarturik zeduzkan, ta oñazez betetzen zuten arantza zorrotz gogorrak; eta negar-malkoak jaitsiko ziran Jesusen aurpegitik, berari bere burutik zetorkion odolarekin nasteka.— Aurpegiko kolorea orduko galdurik zedukan, eta illarena zirudiela, gure Jesus maitagarriak. Begiak andituak eramain zituen, ta zuen oñaze andiarekin erdi-estaliak: anbat izandu ziran, ta alakoak, Jesusek orduko arturik zeduzkan esku-ukaldiak: eta bere arpegi guzia idukiko zuen Jesus maitagarriak odolez, ta listuz, ta ukaldiz ezin galduagoa.

        Belaunetan ezin izan zezaken Jesusek orrenbat indar ta gozo. Nai-ta-ez otzez igaroa arkitzen zen Jesus bera, ta erdi galdua; otz denbora zen alabaña, Jesusen neka-denbora anitz zen Jesusi ordukotz atera zioten odola; luzaro iduki zuten Jesus soñekorik bage; ta orduan ere etzedukan Jesusek oialtzar urratu, lepotik zerion bat beste soñekorik. Era onetan, bada, ta ezinbestez bezala; erdi makurtua, ta oñak nekez zerabiltziela, agertu zien judatar gogorrei Jesus Pilatosek; eta erran zien, lenez gain: Ecce homo: ekusten dezute zuen gizon au. Nik lenago ere anbat aldiz adirazi dizutedan bezala, ez dut gizon onen baitan arkitzen obenik batere, ekusi baditut ere bein ta berriz, ta geiagotan, zuek onen gain erraten, ta ezartzen dituzuen gauzak; eta ekusi ditut zuek zerok begira zaudeztela, ta zen guzia aditzen zenuzela: Et ecce ego ooram vobis interrogans, nullam causam inveni in homine isto ex his, in quibus eum accusatis.— Ala ere, erran nizuen nik emain niola zerbait kastigu, eskuetatik nik au utzi baño len Emendatum ergo illum dimitam; ta ekusten dezue, zein andiak ta zein arrigarriak diran, nik oni eman izandu diozkadan kastigu-nekeak.

        Eta nola-ere, Pilatos jaun, juez gaistoa, nola-ere! Obenik ez duela diozu zuk orrenbat bider, ta aldiz, gure Jesus maitagarriak; eta zearazten dezu zuk Jesus maitagarri bera munduko obendunik andiena zearazi liteken baño ere agitz gogorkiago!— Ez dela, diozu zuk, zergatik eman kastigurik batere Jesus maitagarriari; ta eman-erazi diozkatzu zuk zerorrek, nork daki zenbat, guztiak gogorrak, eta bata baño ere bestea agitz gogorragoa!

        Begira egiozu zuk astiz, ta burutik onetaraño, or dadukazun Jaungoiko-gizon Jesus maitagarriari, ta ekusiko dezu nola dadukaten ori zure kastiguak! Badu geiagoren bearrik Jaungoiko-gizon orrek or bertan, edo anitz luzatu bage, guztiz odolez ustua, ta illotza gelditzeko? bada, gelditu zaion odol-apurra bere buru guzitik, eta azot-ukaldiz egin zaizkan anbat zulotatik dariola, ta dariola dago!— Zer itxura, denbora berean, Pilatos gogorregia, zure kastigu luze baldanak gure Jesusi utzi diotena?

        Oraintxe, bai, oraintxe ekusten dut nik, nere Jesus maitagarria, egia ziola profeta Dabidek, zuri urrutitik begira zegokizula, zure izenean aldi batez erran izandu zuenean.— Ez naz ni, ez, zion Dabidek, giz-idurian edo aintzuran arkitzen nazan gizona; bada, guziak oinpean dakarten arra bezala, erabilli naute ni bart eta gaur nere etsaiak; egin dute nitaz oriek gogo zutena; ta utzi naute ni, dakusazun eran, ta gizatxarren arteko txarrena baño agitz txarragoa dirudidala: et abjectio plebis. Ps. 21. 7.

        Etzara zu, gure Jesus maitagarria, Dabid profeta berak dion bezala, speciosus forma prae filiis hominum (Ps. 44. 3.), edo lurrean agertu den gizonik ederrena, ta bere gauza guziak itxurarik onenean, edo ezinobeki zeduzkiena! Nola gelditu zara, bada, orain zu, zu orain zauden eran? ta nola orrenbat zikintasunez ingurutua, ta orren urrikalkia?

        Asm-al adiña baño umiltasun agitz andiagoa zen zu, Jaungoiko izanik (zaran bezala) gizon egitea: egiñagatik zu gizonik ederrena: ta gizon naturalezaren ta graziaren doai guziak dituzuna, dituzun bezala. Bada zer eratako umiltasuna izain da zu, gizon egin ondoan, gelditzea, gelditu zaran eran, edo gizonaren izena utzi, ta arrarena ar dezakezun eran? ego sum vermis, et non homo.

        Orra, Pilatos: orra zertara duten gaur zure kastiguak, obenik bageko gure Jaungoiko-gizon Jesus maitagarria!

        Zergatik ori!— Urrikal dakiozkan judatar gogorrak, dio, era orretan ori ekusten dutenean.— Bai! on dagizula, bai, juez ez zuzen Pilatos! Laster ekusiko dezu zuk, bai, judatarrena!

        Ekusi zuen, bai; ta bere atsekabe andiarekin alere.

        Judatarrak ala Jesus ekustean, etziran, ez, urrikaldu batere Jesus maitagarriaz; ta, Jesusez urrikaldu lekuan, asi ziran an bertan, gizon amurratuen eran, bazterrak ojuz urratzen, erraten zutela: crucifige, crucifige eum: bai, ongi dago, Pilatos, ta guztiz ongi, gizon orrekin zuk oraindañokoan egin izandu dezun guzi-guzia; baña zere ongi asi au lenbaitlen buka zazu zuk. Ez dezu zer gelditu, eginkizun arkitzen zaitzun guzia zuk egin artean: edo gizon-gaistagin zeatu orri, gurutze batean iltzez josirik, bere bizia kendu artean: crucifige, crucifige.

        A zer musika, Jesus maitagarria, zuri zerbait arintzeko, zere burutik oñetaraño zuk orain dituzun zere min-oñaze arrigarriak!— Alare zure oraingo neke-oñaze guziak baño, oñaze-min geiago ematen dizute zuri zere biotz maitari minbere orretan, zu eta orrelakora zaituzten judatar gogorrak; bada ekusten dezu zuk, oriek orain zurekin duten gogortasuna; ta ekusten dezu, oriek beren gogortasun orregatik, denboraz ekusi bear dutena: edo ekusten dezu zuk, uzten zaituztela orain oriek zu Erromako enperadoreagatik; eta alere laster oriek galduko dituztela erromatar enperadore berak Jerusalengo beren erriarekin, ta erri eder orretako gauzekin.

        Au guzia Jesusek ekusten duen denbora berean, ekusten dago, ekusten duen au baño gauza gogorragorik ere; bada ekusten dago, berarekiko judatar beren gogortasunak eramain dituela judatar berak (garai onez oriek oraingo makurrak ez zuzentzera) eternidade bateko sulezera: ta betiko judatar galgarrien galtze au da, bere biotza, bere neke guziak baño geiago ta geiago, Jesus maitagarriari illuntzen diona.

        Baña ez dute au judatar gogorrak siñisten: uste dute judatarrak, berei, berak zuten erreinua kendu naiez, dabillela Jesus maitagarria; ta orregatik eskatzen diote Pilatosi, ken dezala lenbaitlen Jesus maitagarria lur gañetik; eta illerazi dezala gurutze bateko neke guziekin.

        Aserretu zen Pilatos judatarren onenbat gogortasunekin: ta erran izandu zien: Zer da orain zuek darausazutena! Ill dezadala nik onako gizon au?— Geiegi da oraindañokoan ere zuekgatik onek eraman duena. Ill-erazi nik au? Ill ezazue zerok, nai badezue, zeren gurutzean, edo zeren gogo gaistoak ematen dizuten eran, ta ez dezadazuela niri egiteko onetan bururik geiago autsi: bada ez dut nik gizon onegan arkitzen obenen pitsik ere.

        Bada, jauna, baditu franko ere (erantzun zioten judatar gogorrak) eta bere oben ta gaistakeri oriekin agitz, ta maiz urratuak daduzka gure Legeko gauzak; eta urratuak daduzka, bere eriotza irabazteko punturaño.— Eta ezagu dezazun zein egiazkoa den orain guk esaten dizugun au; eta ezagu dezazun norañokoak diran gizon orren obenak edo kulpak, errege egiteko asmoari guti eritzirik, gure Jaungoiko izan naiez dabill, ta Jaungoiko-Semea delako erausiz bazterrak betetzen dituela.— Ekusten dezu, Pilatos jauna, zer blasfemia! eta an beste obenik ezpalu ere, ez du orrek obenik aski, bizia galtzeko?

B

Ekusten du Pilatosek berriz ta berriz ere
Jesusen oben-gabea; ta ez du alere
gurutzeko eriotzetik libratzen Jesus

        Beren era onetako erausiekin nastu zioten bere burua, judatar gogorrak Pilatos juez erromatarrari, ta utzi zuten, zen guzia; zer egin etzekienaren eran.

        Sartzen da Pilatos berriz bere Salara, ta galdetzen dio Jesus maitagarriari: Nongoa zara zu, gizona, edo noren umea; edo zer da, or dauden Apez, ta gañerako judatar oriek, daraustena?

        Bazekien Jesus maitagarriak, batetik ongi ezagutua zedukala Pilatosek beraren obenbagea, edo inozenzia; ta bestetik, etzegoela Pilatos siñisteko, galdetu zionaren gain eranzun bear ziona (erantzutekoan); bada erantzun bear zion Jesusek Pilatosi, erantzuten asi ezkero, agertuz Trinitateko ta Enkarnazioko, gure bi misteriorik andienak: eta orrekin etzuen Jesusek itzik atera.

        Berariazko Jesusen mututasun edo isillera au ekusten duenean, erraten dio Jesus berari Pilatosek: eta zer? Ez didazu niri zuk erantzuten? Ez dakizu zuk, nik orain zurekin dagikedana? Ez dakizu zuk nai badut nik illerazi zagizkedala, edo gurutze batean, edo beste nik deritzadan edozein bidez ta eran; ta nai badut, utziko zaitudala nik ill bage, edo bizirik, orain zu arkitzen zaran eran?

        Ala da, bai, erantzuten dio Jesusek Pilatosi; baña begira zer egiten dezun, Pilatos; bada zure Jaungoikoak zuri emanikakoa da, zuk orretarako dezun aala ta esku guzia; ta, zuzen ezpadarabiltzu zuk, orain zuk dezun zere aal edo esku ori, kontu gogorrak eman bearra zara zu: gaizki, edo bekatu egiñen dezu zuk zere eskuaren erabillera ez-zuzen orretan: ta gaizki, ta bekatu, nere etsai judatar gogorrak egiten dutena bezain andia; ta arrigarria ez izanagatik, ongi beltz itsusia, ta eternidade bateko neke izugarrien gaia.

        Au berau da Jesusek gaur guri guzioi erraten diguna: bada bere errate onetan berean erraten digu guri gure Jesus maitagarriak: zuen Jaungoikoak zuei emanikakoa da, zuek guziok dezuten ala ta esku guzia.— Eman dizkitzue zuei zeren Jaungoiko maitagarriak, zuek zerok nai dezutela, zeren gauz onak egiteko zuek bear dezuten bere eskua, laguntza, ta indar guzia; ta oriek zuek egiñaz, ta eginaz, grazia ta glori anitz irabazteko bidea: baña, oriek egin bearrean, edo egin lekuan, gauza gaistoak zuek egitera, Jaungoiko emalle bera izain da zuen kontu-artzalle zuzen zorrotza, ta Jaungoiko berak zuei azkenean emain dizue lan txar oriei dagotena, edo eternidade bateko sulezea.— Begira, bada, dio Jesus maitagarriak: begira zer egiten dezuten, Pilatos bera bezala, gaista zaitezkeen gizonak!

        Etzara beldurtzen zu, bekatari txarra, Jesusen era onetako erran orrekin? Ez? Beraz ongi gogorra zara zu: ta, dirudienaz, Pilatos bera baño ere agitz gogorragoa: bada beldurtu zen Pilatos zuri orain adirazi zaitzunarekin; ta asi zen Pilatos bazter guzietan bide billa, gaizkirik ez egiteko, ta gure Jesus maitagarria judatar gaistoen atzaparretatik atera naiez.

        Bazuen orretarako Pilatosek besterik ere. Ezkondua zen Pilatos; ta, judatar gogorren atzaparretatik Jesus atera naiean zebillen denboran, gaztigatu zion bere emazteak Pilatos berari: Begira, gizona, begira, zertara zoazen! Begira zere buruari; ta begira, ta kontu, zere eskuetan dadukazun obenbageko gizon orrekin: bada agitz izugarriak dira gaur niri adirazi zaizkidan gauzak, eta guziak dira orri dagozkanak, ta orren ontzalleak.

        Bere emaztearen mandatu onek adirazi zion Pilatosi, oni beroni len Jesusek adirazia; bada, orain bezala, len ere adirazi zitzaion Pilatosi, egiten bazuen Jesusen gain egin bear etzuena; ta illerazten bazuen obenik etzuen gure Jesus maitagarria, atsekabe ta neke arrigarrietan sartuko zuela berak bere burua; ta, Jesus onagatik ezpazen ere, egin zezala zuzen egin bear zuena, bere onagatik, eta eternidade guziko gaitzaren beldurrez bazen ere.

        Baña bere beldur au kendu zioten judatar gogorrak Pilatosi, edo bere beldur guziarekin eragin izandu zioten berak nai zutena.

        Beldur au ari ken-erazteko; ta naiz beldur, ta naiez ez, ari eragin naiez berak nai zutena, asten dira judatar gogorrak ojuka, ta beren beste gisako beldur bat Pilatos berari arrerazi naiez, esaten diote: Ongi da, Pilatos Jauna, bai, ongi da, Pilatos Jauna, bai ongi da: ori bizirik zuk uztera (etzioten Jesus maitagarriari bein ere deitzen bere izenarekin: ain gogorki begiratzen zioten judatar galduak:) ori bizirik zuk uztera ez diozu ongi nai zuk, ez, zere Erromako enperadoreari, edo zere nagusiari, bada adiskidetzen zara za, zure nagusi enperadorearen etsai orrekin, edo, ari emengo erreinua kendu nai dion orrako gizon gaistagin orrekin. Egizu, baderitzazu, Pilatos Jauna; egizu zuk lan orise; ta adiraziko diogu guk Erromako zure nagusiari zenbat zor dizun zuri, bere ordez emen zaduzkanari.

        Au judatar gogorren ezpañetatik aditu orduko, beldurtu zen Pilatos gizajoa; ta Erromako bere nagusiarekin gaizki gelditzeko beldurrez, etzion kasorik egin izandu bere emaztearen mandatuari, ez eta beste munduko etorkizunari ere; ta, itsu-itsuan bezala, eman izandu zuen gurutze batean iltzez josirik Jesus illerazteko sentenzi gogor ezin makurragoa: ta, gizon baten ongi naia ez galdu naiez, galdu izandu zuen Pilatos gizajoak bere Jaungoikoarena, galdu izandu zen Pilatos bera beti, ta betiko; ta lertzen, ta erretzen dago orain, ta era berean egon bearra da eternidade guzi-guzian.

        Beldurtzen ote nau ni, Pilatos ez bezala, gaizki bizi diranen eternidade bateko sulezean egon bearrak; eta beldur onek eragozten ote derezkit niri, ara daramaten oben kulpak eta bekatuak?

        Ai ene! Zenbait aldiz bai noski; baña ez bear bezala beti, ta uts egin bage! Bada askotan, ta askotan ere ez nintzan oroitzen ni etorkizunaz; ta bein aragi gaistoak, bere oroitzapen lizun, naikunde loi, ta atsegin zikiñekin, eta beste zenbaitetan nere lagun galduak beren erranekin ta etsai gordeak sutuz ta sutuz ni, eragin izandu derozkidate anitz gaizki ta bekatu: ta, orietan nik uste nuen onagatik, galdu izandu dut nik nere Jaunaren grazia; galdu izandu dut nik eternidade bateko gloria, ta galdu izandu dut azkenean nik nere burua.

        Baña beti-betiko!— Bai, bide on bat artu ezpadut nik gerozko nere denboretan, edo ori orain nik ez artzera. Bai, gogortzen ezpanazaie ni nere sulezeko etsai galgarriei, oriek dioten gaizkirik ez egiteko: ta bai baldin gogoan arturik nik gure Jesusek diona, edo, bai dela emendik atera ondoko kontu-artzalle jakintsu zuzen zorrotz-zorrotz bat, egiten ezpaditut nik nere legeko gauzak, eta nere Jaungoiko maitagarriak adirazten dizkidan beste guziak.

        Nere Jaungoiko berak didala, artarako bear den bere laguntza ta grazia. Bai, ta anitz geiago ta geiago ere. Bai arren, bai!

Ecce homo.

Ioan. 19. 5.

        Begira zaiozn, gizon zentzugabea; begira zaiozu, arantzazko bere koroarekin, oialtzar gorri batez inguratua, ta kañabera bat eskuan duela, Pilatosek erakusten dizun Jaungoiko-gizon oni.— Gizona dela, dio Pilatosek: Ecce homo; ta ala da; baña ez du, ez, Pilatosek uste zuen gizon utsa gure Jesus maitagarria; Jesus da alabaña Aita eternoaren Seme bakar Jaungoiko, gure amorez gizon egiñikakoa; ta orregatik da gizonen, ta Aingeru guzien buru maitagarria. Jesus da, gure bekatuak bere gain arturik, orien alde orrenbat neke daramatzien Jaungoiko-gizon ezin altsuagoa. Jesus da, gure guzien onerako daramatzien bere nekeekin, gizonaren aintzura ere erdi-galdua dadukan gizon-Jaungoikoa.

        Begira ezperen, zuk au siñisten ezpadezu: negarrez ta odolez illunduak daduzka Jesusek gaur bere bi begiak! Niri ongi naiez, edo ongi nai onek arrerazi diozkan nekeakgatik dago Jesus gaur bere aurpegiko koloreak galuriik, eta den guzia, eskukaldiz, listuz, ta odolez bete-betea!— Begira: burutik odola dariola dago gure Jesus maitagarria; ta bere gorputz guzia daduka zauri, urratze, ta odol uts egiña!— Orra zer gizonaren aintzura, guri gaur gure amoreakgatik gure Jesusek agertzen diguna! Bada zein ere iduri galduzkoa den, Jaungoiko-gizon ezin-ederrago batena da; ta, nere amorez era onetan arkitzen den Jaungoiko-gizonarena.

        Ongi: ta zer ez diot nik zor, nigatik onela dagoen Jaungoiko-gizon nere Jesus maitagarriari?— Eta zer ez diot nik zorko emendik aitziña, nor banaz ni, ta nik Jesus berari erkatzera, aldian aldiakoa; baldin ori nik eskatzen badiot, ume onaren eran, leneko bere ontarte guziakgatik eskerrak emanaz, oraindañoko nere zorrak ongi ezaguturik, eta orien, edo nere uts guzien damu andiarekin? Ori nork, ongi beintzat, adirazi?

        Eta ez ote dut gaurgero nik nere Jaungoiko-gizon, onen ongillea, ta niri ongi egin nai utsez onenbat neke ta pena daramana, ziñez ta ziñez maitatu bear!— Ez ote ditut nik artu bear, alik emekiena, ta Jaungoiko-gizon beraren izenean, nondik-nai niri datozkidan neke ta naigabe guziak?

        Nai nuke beintzat, Jaungoiko-gizon berak niri laguntzen didala. Lagun zakizkit bada, nere Jaungoiko-gizon Jesus maitagarria: bai arren, bai.

Ecce homo.

        Orra, erraten dizu Jesusen Aita eternoak; orra Jaungoiko-gizon-Jesus nere Seme maitagarria. Orra nola dadukaten gaur nere Seme maite ori bere etsaiak; eta orra nola ta zertan ari den denbora berean nere Seme Jaungoiko Jesus bera.

        Andiak dira, bai, bere etsaiak nere Seme maite Jesusi egin izandu derozten istak eta txarkeriak: baña agitz eta agitz andiagoa da, Jesusek berak ista ta txarkeri orien artean dadukan umiltasuna.— Orra zein beartsu egiñik utzi didaten aldi onetan bere etsaiak nere Jesus maitagarria! Estaltzeko diña ez den oialtzar bat besterik ez diote Jesusi utzi bere soñerako bere etsaitzarrak: eta nere Seme Jesus bera soñekoez gain, bere bizia eman naiez dago zure ta munduko gizon guzien onerako!— Orra, oñazez beterik dadukate burutik oñetaraño nere Seme Jesus maitagarria; ta arrizkoa baliz bezala dago, ta itzik atera gabe, Jesus bere oñaze guzien artean!

        Ona, nere Seme on ori ezin ekusi dutela daude orren etsaiak, eta, lenbaitlen oni bizia kendu naiez, ojuz, ta ibilliz bazterrak urratzen dituztela: ta Jesus denbora berean oriei ongi naiez dago, ta orien, ta nai duten munduko guzien onerako pozik daramala daraman guzi-guzia, ta or bertatik eman naiez dago Jesus bere zañetan ta biotz-maitarian gelditu zaion odol guzia!— Orra bada non dagoen, dio azkenik Aita eternoak; orra, zuei erakusten dago nere Seme-Jaungoiko Jesus maitagarria, zuek nerekiko, ta zeren etsaiekiko gaurdanik egin bear dezutena.— Begira egiozu, bada, bein ta berriz, ta maiz ta maiz ere, ta egizue zuek zuzen, nere Seme maitari maitagarriak gaur erakusten dizuten guzi-guzia.

        Ongi da, Aita eternoa: begiratuko diot nik beintzat, bai, zure Seme Jaungoiko-gizon, ongi nekatu oni; baña begiratu bear diozu zuk ere zerbait zu beraz urrikaltzeko: bada Jesusen umiltasunak, Jesusen gabeak, (eta gabe, Jesusek berak bere naiez daramanak), Jesusen isillerak eta pazienziak, eta Jesusek zuri dizun, ta bere etsaiei ere dien, nai andi ta amore bazterrik-gabekoak diote, obenik bage daramala berak daraman guzia: ta, ongi dirudien gauza da, era orretan nekatzen denaz nornai urrikaltzea.

        Eta, erraten badidazu zuk, niri, nere Aita maitagarria, Jesusek berez obenik ez izanagatik, obendun arkitzen dela Jesus, eta gure guzien obenak bere gain artuak daduzkala, aitortuko dut atsegin andiarekin, zuk orregatik diozun guzia, baña onegatik diot berriz ta berriz ere, begira dezozala zuk, zure Seme Jesusek gure obenen beren alde egiten duenari: begira dezozula zuk gero Jesusi bere barren aldera, baldin ekusi nai badezu zuk nola daduzkan gu guziok, naiez ta amorez ongi sartuak bere Biotzeraño; ta Jesusen guganako amore ta nai andi onegatik artu zazu zuk, Aita eternoa, oraindañoko gure zorren alde, oriekgatik Jesusek daramadan neke guzi-guzia; iguzu zuk bera berriz geren bekatu berriekin ez nekarazteko grazia. Bai arren, Aita eternoa, bai!

Ecce rex vester.

Joan. 19. 14.

        Orra non dezuten, erran zien gure Jaungoikoak len judatar gogorrei Pilatosen ezpañez; orra non dezuten zuek zeren erregea. Orra, zuek aspaldi guzian uste zenuzten zeren Mesias, Dabiden etxetik datorkizuena.— Datorkizue zeren onerako, ta zuek, zeren neke galgarrien artetik atera naiez. Ez dezozutela kendu zuek zeren Errege Mesiasi bere bizia, zuek zerok eskatzen dezuten bezala.— Artu zazue zuek gaurdanik zeren erregetako Mesias au, manatu edo agindu dezan emen bertatik zuen biotzetan. Nai dezue?

        Ezetz, eranzun zuten judatar galduak; etzutela nai zioten, Erromako erregea beste erregerik. Illerazi zezala Pilatosek, zioten, Jesus; ta lenbaitlen alere; ta illerazi zezala gurutze bateko eriotz guztiz gogorrarekin.— A, judatar ero gaistoak! Egunen batez damutuko zaitzue bai, orain zuek ez artuaz, zeren Profetak erakutsirikako zeren Mesias, zeren errege au!— Mesias errege au zuen erregea da orain bertan; ta zuen beren errege izain da eternidade guzi-guzian ere: ta zuek zeren errege onen eskutik artu bearko dezue, naita-ez, eternidade guziko zeren nekea, edo atsegin-kontentua: ta ez da eternidadeko atsegin-kontenturik, bere erregetzat Mesias au artzen ez duenarendako.— Begira, bada, zer diozuen, judatar gaistoak: begira ongi, ta begira berriz ta berriz ere! Zer diozue, bada, judatar eroak, zer diozue? Ezetz!— Ezetz diote: ta beren ezetz orretan gogortuak gelditzen dira judatar galduak!

        Eta zertan ote zaude zu, edo zer ote diozu zuk, Jesus maitagarriaren ume bekatariak!— Orra (Aita eternoak erraten dizu zuri ere): Orra non dezun zuk, ona zere errege Mesias, Jaungoiko-gizon Jesus maitagarria. Itxura txarrean orain egonagatik zure Mesias errege ori, errege jakintsua da; errege beratx urrikaltia da; errege aberats guztiz emallea da; ta errege bereei, ezin geiagoraño, nai diena: ta, ez dagokan oraingo itxura ori ere, bereei ongi naiez daduka zuen Mesias errege maitagarriak; bada errege onek berak artu nai izandu ezpalu, etzion arreraziko bere, guztiz galdua dirudien, itxura ori mundu guziak ere: au da alabaña, zeru guzian, ta lurreko edozein bazterretan, nai duen edozein gauza egiten duen Erregea; bada nere Seme bakar-maite Jaungoiko-gizon Jesus maitagarria. Ekusi zazu bada nai dezun, edo ez, au zuk zere Erregetako?

        Baña begira, dio Aita eternoak berak; begira: Jesusen soldadu onak ibilli bearko dute Jesusen beraren eran. Artu bearko dituzte, Jesusek berak bezala, ta nere izenean, edozein aldetatik egiten zaizten bidegabeak eta txarkeri guziak: onez erantzun bearko die gaistoen gaizkiei, ta errebestasunei: maitatu bearko dituzte beren etsaiak, eta gaizkigilleak: garaitu bearko dituzte beren pasioneak eta aztura gaistoak; eta egin bearko dituzte, Jesusen Lege garbiak eskatzen dituen gauza guziak.— Ori guzia egin nai dutenak dira, Errege maitagarri au beretzat artzen duten soldadu onak.

        Nai dezu, bada, artu zuk ere; ta nai dezu egin orretarako eskatzen zaitzun au guzia?

        Bai, Aita eterno maitea, bai; ta pozik alere. Lenago au ez egiñaz dut orain agitz damu; baita, len, nere lan on au egin bagez, egin ditudan oraindañoko nere bekatu guziez ere: ta asi nai dut orain nik nere lan on au nere bekatu orien barkamentutik, onen eskean ziñez esaten dizudala: Nere Jesukristo, etc.