LVII.garren OTOITZ-GAIA

JESUSEN TA BARRABASEN
BERDIÑERA, TA BEREISTIA

A.

Ematen die Pilatosek juduei,
bitatik bat: Jesus edo Barrabas

        1. Damutuko zitzaion Pilatosi, edo naigabetuko zen Pilatos, berriz Jesus bere eskuetan, Herodes erregek itzulirik, ekusi zuenean; bada igorri zion Jesus Herodesi, Jesusen egitekoan deus ez ebaraki naiez; ta naita ez ebaraki bearrean gelditzen zen, Jesus ona berriz aren eskuetaratzearekin.

        Artzen du bada berekin Pilatosek Jesus maitagarria; artzen du zetorren eran, edo zuriz jauntzia, ta eroaren idurian, ta aintzura txarrean. Ateratzen du, berekin berriz leneko leku edo ekustegi berera. Deitzen die, bein, beste judu guzien izenean itz egiten zuten Apaizei, oriekin batean an arkitzen ziran Kargudunei, ta azkenean gañerako judu guziei: ta erraten die Pilatosek: Ona non dezuten, zuek zerok ekarri didazuten gizon au. Zuek erran izandu didazue niri, gizon onek nastuak daduzkatziela bazter guziak, eta, ez dakit beste zenbat, zeren gogoak eman dizuten, gauza: ta orra, nik egin diozkat oni, zuek zerok begira zaudeztela, nere karguak, edo niri zegozkidan galdetze guziak: eta ekusi dezue zuek zerok, ez dela egiaren pitsik ere, zuek esan didazuten guzi-guzian. Luc. 23. 13. etc. 14.

        Herodes errege zuen erritarra da, edo bazter ebetakoa. Badu, bai, Herodes erregek zuen usantzen, zuen Legeen ta gauzen, bear den adiñako berria: orregatik igorri zaituztet nik zuek Herodes erregeagana gizon onekin berarekin, ekusi zezan Herodesek, egia zen, edo ez, zuek emen zeniotena; ta, ala zelarik, eman zezon zegokan sentenzia.— Eta zer egin du gizon onekin gizon andi errege Herodesek? Onen soñeko onek adirazten duena: edo zuei zeroi begitan ematea zeren aser-era, ta pasione sutuarekin; ta zuei zeroi adiraztea, obenbagekoa dela, zuen iduriz, munduko obendun andiena den gizon au.

        Zer nai dezue bada zuek, dagidan nik era onetako gizonarekin? Il-erazi obendundako, obenen pitsik ere ez duela?

        2. Orie: Bazkoetan arkitzen gara, zuek zerok dakizuen bezala; ta, aldi onetako Bazkoz eman oi dizuet nik, Presondegian arkitzen diran gaistagin guzietatik bat, edo orietatik edozein, zerok eskatzen dezutena.

        Ez dut nik, ez, zuen usantza galdu nai, niola ere. Baña aurtengo zuen Bazko andi onetan laburtu nai dizuet zerbaittxo zeren usantza, Presondegian arkitzen da gaur, anitz beste gaistoren artean, Barrabas deritzan gizon guztiz errebes galgarri bat.

        Au da, zuek zerok dakizuen bezala, lapurreri andiak egin izandu dituen gizon, etxeen nasgarri bat. Au da, gau ta egun bazterrak asaldatzen dabillen gizon bat, eta norekin-nai, ta guziekin, noiznai gaizki datorren gizona. Eta au berau da, oraindik anitz ez dela, bere aser-aldi batean bati bizia kendu zion gizatzarra.

        Gizon, onen gaisto au, bada, ta zuek emen ekusten dezuten Jesus, dira aurtengo Bazkoan zuen eskuetan gelditzen diranak. Bietatik bat emain dizuet nik, bai, baña ez besterik. Zer diozue Jerusalengo jendeak? Zer diozue, judatarrak? Zein nai dezue, eman dakizuen zeren aurtengo Bazkoan, Jesus edo Barrabas? Quem vultis dimittam vobis, Barabam, an Iesum? Matt. 27. 17.

        Ederki, Pilatos jauna; ta ederki alere! Obenik ez duela, diozu zuk, gure Jesus maitagarriak; eta obendun gaistoen gaistoenaren aldean ezartzen diezu judutarrei, ta Jerusalengo guziei! Badakizu zuk, juez jauna, naigabe utsez Jesusi gaizki-iritzik, eta ezin ekusiz Jesus maitagarria, dirala juduen erausi guziak. Ibid. v. 18.

        Eta egia baliz ere, oriek dioten guzi-guzia, egin zenezake zuk Jesus maitagarriarekin, egiten dezuna baño gauz-itsusiagorik? Bada, Bazkoz presondegitik ateratzen diranen artean ezartzen dezu zuk Jesus maitagarria; ta orien artean ezezik, guzien artean gaistoenaren aldamenean: ta juduak artzen badut ere, Barrabas uzten dutela mundu guziak usteko du, gaistoa zela Jesus; ta, juduak Jesus bere katepetik ez ateratzera, presondegian usteldu bearra, urkabera bearra, edo nekez ta kastiguz zenzarazi bearra zela Jesus; ta, uste onetan gelditzen badira munduko jendeak, ez dira mundukoak egoin, ez, Jesusen Lege on guztiz garbi-zuzena artzeko: ta orra zugatik, Pilatos jauna, galdurik bezala betiko gure Jesus maitagarria!

        Lan ona, Pilatos, bai segurki, zuk gaur Jesus onari egiten diozuna! Lan ona, bai, onik izandu bada, mundua mundu denetatik.

        3. Baldin bazekien Pilatosek (errain didazu zuk) Judatarrena; baldin bazekien etzutela agertu Judako Apezek beren erausi guziekin egiazko gaizkirik Jesusen gain, edo kontra; ta, egia bazen (zen bezala), Pilatosek berak erran ziena judatar gogorrei, ark egiazko gaizkiak baizik ezin kastiga zitzakela; nola orain sartzen du Pilatosek gaistagin arrigarrien artean, orietatik bat bailiz bezala, gure Jesus maitagarria.— Juez beldurti txar, bear ez bezalakoa izanez Pilatos; eta zeren Pilatosek obeki begiratzen zien gizon aberats erausleei, ixillik zegoen Jesus beartsuari baño.

        Eta ez ote dira arkitzen egungo egunean ere gure artean zenbait orrelako gizatxar beldurti? Ez ote naz ni nerau ere orietatik bat? Bik billatzen banaute ni; ta oriek badira, aberatsa bata, ta bestea ondasun-gabea, edo ez orrelakoa, zeiñi begiratu oi diot nik geienik? Beartsuari? Ez-aberatsari?— Orrek biok badiote, edo batzarrean, edo lagun artean; batak bat eta besteak bertzea, egia izanagatik aberats-ezak esaten duena: ori bera erran oi dut nik ere, edo erran oi dut nik beste aberatsak nai duena.

        Artu-emanetan badabiltza oriek berak, edo besteren bi; edo auzitan, ta pleitotan badabiltza, era bereko besteren batzuek, beartsuari nik eman oi diot eskua batetan, edo banaka, niri au oriek eskatu ezkero?

        A! noski nik beartsu orri eskurik ez emateagatik, besterik ezin dudanean, igesiari ematen diot, edo, aberatsari atsekaberik ez egiteagatik, gelditzen naz ni guztiz mututua, edo ez dut agertu nai nik ager nezaken gauzarik batere, naiz atera dedilla nai bezala, ta gaizki, errumes beartsua, edo gutiena dezakena!— A Pilatos gaistoa ni ere! bada, Jesusen ume beartsuarekin onenbat egitea, Jesus bera gaistoen artean uztea bezala da.

B.

Juduak, edo judatarrak Jesus utzirik,
artzen dute Barrabas

        1. Zer egin ote zuten judatar gogorrak, bitatik bat; Barrabas edo Jesus maitagarria, artzeko eskua Pilatosek Bazkoz oriei eman zienean? Edo zein artu ote zuten bietatik judatar gogorrak, beren Jaungoikoari eskerrak emateko, zeren lenago atera zituen judatar beren aitziñeko israeldarrak ijito gogorren eskuetatik?

        Zein? Barrabas, edo Jesus?

        Ganz arrigarria zen, Jesus utzi, ta Barrabas artzea. Bazekiten judatar Apezak, nekazariak, arrantzaleak, langilleak, eta gañerako, antustez, jakiundez, diruz, ta arrotasunez beterik bizi etziran guziak ongi nai izandu ziotela beti Jesus maitagarriari; pozik aditzen zituztela Jesusen itz onak; eta, oriek aditu naiez, ibilli oi zirala gaisoak erriz erri, edo tokiz toki.

        Bazekiten Apez berak, bai, Jesusek egin oi zituen sendatze ta gañerako gauz andiak begi onez ekusi oi zituztela, ta ziran bezala Jaungoiko-gizon baten mirakullotzat jenda-era onek berak, eta beldurtu ziran, Barrabas utzirik, eska zezaten oriek beren Jesus maitagarria, ta geldi zitezen Apezak berak, eta beste, Jesus gurea galerazi naiez zebiltzan guziak, len ere baño agitz gaizkiago, ta atsekabe ta damu geiagorekin.— Beldur onekin, bada ta, zekitenak bezala, artu zuten Apez berak beren bidea, Jesusi ongi nai zioten oriei, Jesus utzirik, Barrabas ar-erazteko.

        Sartzen dira, bada, orien guzien artean; ta batzuek batzuei; ta besteak bertzeei adirazten die Jesusen gain, berak asmatu ala; ta noski, beste zenbait gauzaren artean, begira zutela zer egitera zidoazen, baldin, Barrabas utzi, ta artzen bazuten Jesus maitagarria. Asiko zela Jesus berriz ere bere predikuz ta milagroz bazter guziak nasen; gogan-beartuko zirala erromatarrak; eta, orien petik judatarrak atera zitezen beldurrarekin, beteko zituztela armaz ta soldaduz judatar beren, ta israeldar guzien erriak eta bazterrak; eta galduak izan bear zutela batak ta besteak.

        Oriek guziak, bada ta era bereko beste anitz asmazio ta gauza sarten diotzate buruan jende gaisoari, an zebiltzan Apezak, errespetuzko jendeak, eta kargudunak; eta eragiten diote jende berari, berak nai dutena, edo eskarazten diote Barrabas, aldebat utzirik gure Jesus maitagarria.

        Orobat egin oi dute gurekin ere gure etsai sutu-galgarriak.

        Erraten digu guri guzioi gure Jaungoiko maitagarriak, zer gauza den guk nai duguna? Nai dugun guk gure Jesus bere Lege zuzen-garbiarekin, edo nai ote dugun guk Jesusen lege berak debekatzen digun zer edo zer? Bizi nai dugun guk besteren gauzarik artzen ez dugula, edo lapurrerietan? Izan nai dugun guk itzez, gogoz, eskuz ta lanez garbiak, edo nai dugun ibilli arin, ta aisa, loiez loi, itz zikiñez zikin, asmo gaiztoz gaisto, ta atsegin lizunez lizun ta likits?

        Ibilli nai dugun guk bidegaberik bage; edo bidegabez bidegabe, ta txarkeriz txarkeri? Barkatu nai ditugun guk geren atsekabe ta naigabe miñak: edo arkitzen garan gu, gaizkiren bat egiten digutenei ordañez erantzuteko asmoan? Izan nai dugun guk Jesusen ume umillak, eta bear bezalakoak; edo, arrotzar errebes, gogoak ematen digun eran bizi nai dugunak?

        Otz-otzean galdetzen bazaiku guri au guzia, edo era bereko zer edo zer, gure Jaunaren alde jarriko gara gu; ta erantzunen dugu, guk gure Jesus maitagarria bere lege garbi onarekin nai dugula.

        Baña sartzen badira gure artean, bein sulezeko etsai amurratuak, gero mundu eroa bere gauzekin, ta azkenean naikunde makurrak eta aragi gaistoaren su biziak; eta bein bakoitzak bere bidetik, eta gero guziak elkar artzen dutela ta tentatzen gaituztela, askotan arrerazten digute, lenbizian guk gerok nai ez genuena; edo, gure Jaun maitagarria bere lege garbiarekin aldebat utzerazirik, arrerazten digute, gure Jaunaren Lege berak debekatua, ta Jaun beraren etsai galgarria, edo bekatua.

        Anitz nekatzen ote dira, beren lan gaisto au guri eragiteko, gure etsai-era oriek?— Ez, beintzat batzuetan!— Ez da au ala? Errazu ezperen: nai etzenuen itz bat aditu orduko, etziñan sutu zu, itz ura zuri erran zizunagana?— Bide gaistoak, edo okasio txarrak eskura zizuneko etzenuen artu zuk, eta an bertan gorde, besteren era onetako edo artako gauza ura?— Itzketan zu asi bezain laster zuk zerorrek dakizunarekin, etzebiltzan an zure ezpañak eta zure eskuak, bear ez bezala, ta agitz lizunki?— Sartzen ziñan zu, zuk zerorrek dakizun jostaketan, zere biotza edo besterena an zuk erre-erazi gabe?— Etzen askotan aski zure begiratze arin txar bat, atsegin loi batez zikintzeko zuk zure barren guzia?— Aserretzen ziñan zu noizbait, edo aldiren batzuetan?— Ezin errazago!

        Bagetzen ziñan gero zu?— Bai; baña, nork daki noiz? Gogortzen ziñan zu zere gurasoekin? Mukertzen ziñan zu gañerakoekin?— Aisa, ta maiz!

        Orra bada zein neke gutirekin eragiten zizuten zuri zere etsaiak, berak nai zutena, ta Jerusalengo Apez nagusiak, Gizon adituak, eta Kargudunak israeldar gasoei eragin izandu ziena.

        2. Nola beren lan gaisto orretara ote ziran israeldar gaisoak, edo, Jesus utzirik, Barrabas artzera?— Lenbiziko aldian etziran trebe izandu; ez eta saiatu ere beren lan txar galdu au egitera; ta Pilatos juezak erran zienean zein nai zuten berak, agertzen ziezten bietatik, edo Jesus, edo Barrabas? Apez gaistoak, eta gañerako orien lagunak bazerausaten ere, Jesusen gain edo kontra, mututurik gelditu ziran gañerako jendeak; baña Apez orien, ta orien lagunen itzontzikeriari berriak eman ziezteneko, asi ziran beren gaitz aldera makurtzen; ta Pilatosek gero bigarren aldian erran orduko, zein nai dezue zuek, orain nigandik aditzen dezuten bietatik: Jesus, edo Barrabas? Bertan, ta batetan eranzun izandu zioten: Barrabas: au da, au, guk orain nai dugana, ez beste ori, ez Jesus: Quaem vultis de duobus vobis dimitti? At illi dixerunt: Barabam. Ibid. v. 21.

        A zuek, Apez gaistoak! A zuek, Eskribatzar galdu-galgarriak! Israeldar zentzugabeak egin dute, bai, zuek nai zenuten egitekoa; baña oriek beren ezpañez eskatugatik, zuek zarazte zeren Jaungoikoarekiko lenbizikorik Barrabas eskatzen dezutenak! On dagizuela, bai; bada emen bezala, Barrabas izain da gero ere sekulako zuen lagun ta adiskide!— Zorigaistoan jaioak noinbait zuek, erran dakikezue zuei orrenbat anima gaisoren galgarri gaistoei: bada oraingo zuen lanari dagokan bukaera da betiko sua, ta beti lerturik suleze arrigarrian erretzen egotea.— Ez dezue zuek anitz urrikari, ez, orain zuek neke-penetan darabiltzuen Jesus maitagarria, orrenbat Jesusen nekerekin aspertu gabez, zeren aldean ori utzirik, Barrabas artzen dezutenean: ez eta zeren buru gaisoa ere; bada, neketan zuek Jesus uztearekin, zuzen-zuzen zoazte zerok beti-betiko zeren buruak galtzera.

        Zer egiten dezue zuek, israeldar gaistoak? Barrabas bategatik, galdu betiko Jesus maitagarria? Galtzearen andia!

        Ai ene! ta ez ote da galtze agitz itsusiagoa, nik bein, ta askotan ere egin izandu dudan, Jesus beraren galtzea? Ez dut galdu izandu nik ere nere Jesus, bekatu larriren bat egin izandu dudan aldioro? Ez dut galdu izandu nik, ongi-ongi, ta agitz garbiro nekiela zer zen, ta norañokoa, nik orretan galdu oi nuena?

        Israeldarrak jakin balute, nik dakidan eran, nor zen Jesus, utziko zuten gure Jesus maitagarria Barrabas gaistoagatik? Ez dut uste.— Eta ez nekien nik, ni nerau bekaturatzen nintzanen aldietan, gure Jesus maitagarria zela Jaungoiko-gizon, nere amorez orrenbat neketan ibilli ondoan, gurutze batean illik gelditurikakoa?— Eta au guzia nik nekiela, utzi dut nik nere Jesus maitagarria ezer-ez bategatik, atsegin txar lizun loi bategatik, edo edozein beste bekatu mortalegatik?— Eta utzi dut nik nere Jesus maitagarria, bein ezezik, berriz, ta birretan, ta nik neronek dakidan aldi guzietan?

        Au badakit nik, eta alere etzait damuz lertzen nere biotza ta barren guzi-guzi au?

Qui juxta me erant, de longe steterunt;
et vim faciebant, qui quaeredant animam meam.

Ps. 37. 13.

        Zer egin ote dira, gure Jesus maitagarria, zure Apostoluak? Zer, zurekin zebiltzan gañerako jendeak eta gizonak?

        Igesi joanak dira nigandik, eta guztiz urrun dabiltza, dio Jesus maitagarriak. Ongi: ta ez da au berau nik ere, beti-beti ez izan arren, askotan beintzat, egin izandu dudan lan txarra, ta egiteko eskergabekoa? Ez nenbillen ni ere, edo geienean, edo maiz aski beintzat, nere erara, nere gogara, ta zure Pasioneko nekeez, zure ibillera penatuez, ta egote gogorraz oroitu ere gabe, nere Jesus maitagarria? Eta ez da au, zure igesi ni, ta zugandik urrun, ibiltzea?

        Baña nor naz ni, era onetan oraindañoko denboran ibilli nazan gizatxarra? Ez naz ni, nere Jesus maitagarria, gizon guzien artean zure alderena bizi diranetatik bat?— Ez naz ni, geien-geiena zuri zor dizuten zere umeetatik? Eta orietatik nazala ni, ni naz oraindañokoan onen eskergabekoa? Onen itzurria? ta onen galgarri galdua?

        Eta alere ixillik arkitzen zara, zu, nere Jesus maitagarria? ta alere zu, ni zere gogoan nadukazula, arkitzen zara beti? ta arkitzen zara beti, niri ongi naiez, ta nere onerako, orrenbat nekeren ta etsai galduren artean lagun bat badere zere alde ekusten ez dezula. A, nere Jesus maitagarriegia! ta noiz erantzun nik zure amore bazterbagekoari?— Ongi beintzat, ez eta eternidade guzian orretan ni ariagatik ere!—Gaurdanik badere banegi nik nere lan on onetan nere alegina!

        Baña zure Apostoluak, eta ni, nere Jesus maitagarria, era onetan ta zure igesi gabiltzan artean, nola dabiltza, ta zer lekutan, zure etsai judatar gogorrak?— Zure orpoetan dabiltza orietatik batzuek, zuk iges egin dezazun beldurrez bezala; ta zure begietan arkitzen dira gañerakoak, eta inguruan, zu, gaizki illik lenbaitlen ekusi naiak, eta guziak dabiltza zuri zere bizia era gogorren batean galerazteko bideak billatzea bezala: ta, orretarako, or dabiltza guziak ojuz, marmariz, gezurrak asmatuz, Pilatos beldurtu naiez, ta israeldar gaisoei engañioz, ta lilurazioz beren begiak betetzen dieztela.

        Eta ez ote nabil orien eran ni ere! Ez ote dut nik askotan nastu (ta agitz alere) nere adimentua, ekus ez zezan onek nere gaistakerien itsustasuna, ta nere gaistakeriekin nik Jesusi emanikako atsekabea, ta damu izugarria?— Etzen au, nik nere aldetik alegina egitea, nere Jesusi ken zezoten borrero gogorrak bere bizitza?

        Onetan ibilli naz ni, bai, judatar gogor itsuen eran, ta ero galdu bat zebilken bezala; ta artan ibilli naz ni, zertan nenbillen oartzen ez nintzala?— Eta au guzia orain nik ezaguturik ere, onen dama labur-epelarekin arkitzen naz ni; ta arkitzen naz ni, arkitzen nazan bezain otz, eta atsekabe gutirekin?

Ego autem tamquam surdus non audiebam,
et sicut mutus non apericus os suum.

Ps. 37. 14.

        Niri gaizki nai zidatenak, dio Jesus maitagarriak, erraten zuten nere gain gogoak ematen zien edozein erakeri ta gezur. Bazerausaten, bai, berak nai zutena, ta etziran erausiz aspertzen bein ere jenda-giro txar galdu oriek; eta oriek izan naiez zer erausi nere gain, beren gogara ni berak galerazi artean, goizatik asi, ta gaueko beranduraño asmatzen zeuden beti erausi berrien gaiak, eta nere galbideak: eta alere ni guztiz gor-egiñik, edo deus aditzen ez duen edozein gizon gorren eran.

        Zergatik au zuk onela gure Jesus maitagarria?— Zuri ongi naiez, dio, bekatari txarra, ta zuri zuzen erakusteagatik nola egon bearko dezun zuk, ongi egoteko zu era bereko erausiz, ta bidegabez zere bearriak zuri betetzen dizkitzutenetan.

        Pilatosek etzekien, ez, onelakorik, zuk ederki dakizun bezala, gure Jesus maitagarria; ta ala ere Pilatosek, ekusi orduko, ekusi zuen eran, zure mututasuna, ta judatar galduen erausi-ta-erausia: ta judatar berak zure gain asmatzen zutena, ta bazter guzietan zeraustena, erran izandu zion Jesus maitagarriari arrituaren eran, ta judatar gogorrak berarazi naiez: Ez dituzu aditzen zure etsaiak emen zuri gaur asmatzen dizkitzuten gauzak? Non audis quanta adversus te dicunt testimonia?— Zertan zaude bada zu gaur emen, orren mututurik? Zergatik urratzen ez dituzu zuk zere egi garbi zuzenekin orien gezurrak? Zergatik isillerazten ez dituzu zuk emen bertan itz-ontzi gezurti oriek?— Orra Jesus maitagarriari gaur Pilatosek erraten diona.

        Baña zer ote dio Pilatos onen erranetara, berariaz, edo bere naiez mututurik arkitzen den gure Jesus maitagarriak?— Itzik ere!

        Eta zer ote deritza Pilatosek era onetako Jesusen ixillerari?— Ark deritzana da, au dela mundu guzian arkitzen den gauzarik berriena, ta arrigarriena: Ita ut miraretur Praeses vehementer.

        Alere da, ta: da alabaña, utsik ez duen Jaungoiko-gizon baten egiteko, edo lan ezin zuzenagoa; ta Jaungoiko-gizon, bere Aitaren izenean, itz bat atera nai ez duenaren ixillera, denbora berean ekusten badu ere beren itz galdu-txar gezurtiekin judatar gogorrak zikintzen diotela, beren naiez ta ustez, bere mira ezin-garbiagoa; ta au oni aiek zikindu ondoan, kendu nai diotela duen odola ta bizitza; ta kendu nai diotela, Barrabas bezain gizon gaisto bati barkatzen diotela badere.

        Izan bear ote dut nik gaurgero, au guzia nik nere Jesus onagandik ikasi ta ere, oraindañokoan izandu nazan bezain minberea, edo izukorra? Nai ez nuken itz bat nik aditu orduko, erran uste dut nik bertze bat, aditzen dudana bezain gaistoa, edo agian gaistoagoa? Ez ote dut artu bear emekitxo nik, eta itzik ere atera bage, nere Jesusen izenean, era orretako edozein itz, nik dakidan ezkero orain dakidan bezala, zenbat eta zenbat era berean artuak daduzkan nigatik nere Jesus maitagarriak? Bai, baldinbere! Bai berak laguntzen didala, bai!

Convenerunt... adversus... Jesum Herodes,
et Pontius Pilatus cum gentibus,
et populis Israel facere quae manus tua,
et consilium tuum decreverunt fieri.

Act. 4. 27.

        Gaistoak badagikee, zenbait aldiz beintzat, berak nai dutena; baña, guk ala nai izatera, gure onerako dira gaistoen gaizki ta gaistakeri guziak. Ez dugu guk orretarako Jesus maitagarriari begiratzea, ta Jesusen eran ibiltzea besterik bear.

        Israeldarrak, eta judu gogorrak ibilli ziran Jesus illerazi naiez; ta azkenean eragin zuten oriek, berak nai zutena, irabazten zituztela, beren lan galgarri onetarako, Pilatos, Herodes, ta, artarako ziran gizon guziak.

        Egin zezakeen israeldarrak, beren lan au baño gauza gaistoagorik? Eta zer ote zion, orretan oriek zebiltzan denboran, gure Jesus maitagarriak?— Israeldarrak, eta juduak, gaizki naiez billatzen ziotela, berak gero izandu zuen eriotza: baña, oriek ematen zioten eriotz beretik atera nai zuela Ata eternoak bere gloria, ta munduko galduen ona; ta Aitaren nai onari begiraturik, nai zuela Jesusek berak ere judatar galduak, gaizki naiez, ematen zioten eriotza.— Orretarako kendu zituen bere begiak Jesusek juduen gaizkietatik, judu gaistoetara mindu etzekion batere bere biotza, ta Aita eternoak nai zuen eriotza gogoan arturik, erditsi zuen Jesus maitagarriak beraren Aitak berak nai zuena; baita izen guziak garaitzen dituen izen andi bat ere, ta, gero zeruratzen zeneko, Aita beraren eskoi aldea.

        Nai diozu zuk ere atsegin andi bat egin zere Jaungoiko Aita maitagarriari, txarkeriak, bidegabeak, gaizkiak, edo nekeak zere gain ekusten dituzun aldietan? Nai dezu zuk bidenabar irabazi izen andi bat, eta anitz gloria beste mundurako?— Egizu bada, Jesus maitagarriak zuri gaur erakusten dizun egitekoa. Ez begiratu, bada, bat ere zuk, zuretzat Herodes, Pilatos, edo orien pekoa dirudien giza-giro orri; ez begiratu, zuk batere, judu gogor gaistoak baño gogorragoa, edo gaistoagoa dirudien gizatxarrari, edo emakumeari: begira zaiozu zuk zere Jaungoikoari: eta ezaguturik dena, den bezala, edo zure Jaungoikoak ala nai izandurik dela, zuk Jaungoiko beraren izenean, ta zure animaren onerako eraman bear dezun kezka gogor edo naigabe ori, eramazu zuk alik emekiena, ta Jaungoiko berari eskatuz, zere lan au zuk ongi egiteko bearko dezun Jaungoiko beraren laguntza ta grazia.

        A, nere Jaungoiko maitagarria! Nik nere lan au era onetan egin izandu banu nere oraindañoko denboran, gaur zerurako milla ondasunekin arkitzen nintzan ni, ta nere orain arteko, ta gaur bertako nekeak ere, eraman oi ditudan baño arintasun geiagorekin, ta agitz aisa naramatziela!— Baña galdu dut nik au guzia; ta zeruko nere bide zuzena galdurik, ibilli izandu naz ni, nork daki zenbat bekaturen artean?— Ez al dut berriz nik egiñen, era bereko ibillerarik? Ez baldinbere, ez!— Egiñen al ditut nik, orien lekuan, bere aldi onetan Jesusek niri erakutsi dizkidanak?— Nai nuke beintzat bai, ta oraindañoko nere utsen barkamentua ere. Ori eskatzen diot nere Jaungoiko maitagarriari, itzez ta biotzez erraten diodala: Nere Jesukristo Jauna, etc.