Jondoni Paulo-ren

                        Erromako elizan

                        izan ondoan...

TARZEKO PAULO...

                Tarzeko Paulo suzko gizona,

                Hebrearretan Hebrearrena...

        Borrokan eta kalda gorrian zinabiltzan,

        Herritarretan hebreargoak iraun zezan.

                Tarzeko Paulo suzko gizona,

        Zer egin duzu Herriko mina?

        «Agertua zait dena iduzki Kristo Jauna

        Eta eman dut eta eman naiz hari dena.

                              * * *

        «Kraskarazi daut Kristoren hitzak bihotza

        Eta zabaldu: Jainko-semeen bidea;

        Herri-lokarri, gizalde-mugak

                        denak hauts ahal banetza,

Hebrear eta jende guziek hartan lukete betea.

        Jainko-semetuz, adiskidetuz denekin

        Osokian da gizon bakotxa gizontzen.

        Herrialdeak, Kristoren argiz,

                        ditela denak bat egin,

Anaituz eta mugak errautsiz denak libratu ditezen.

        Ezin hila da zainetan Kristo duena:

        Haren Herriak dirauke beti betiko.

        Zoriontsua bizi guziaz

                        Kristotua den gizona,

Jaun Goikoaren azkatasunez Herria baitu haziko.»

                              * * *

        Jondoni Paulo lurreko jaunek zigorkatua,

        Adiaraz gaur gizon libroen oihua:

        Denak inarros, eta sar gutan

                        zure barnean zen sua.

Euskal-Herria barnez kristautuz berri dezagun mundua.

17-10-77