Giltzapetuak

                        dauden gazteri

HORI BAKARRIK...

        Hori bakarrik, hori guzia

                hori da gure bizia.

              * * *

Gela beltzetan ilun jarriak

                zaudezten euskal-gazteak,

Ez egon hola herra-sukarrez

                hertzetaraino beteak.

Beren geletan otoitz-biziaz

                entzun indarka fraideak,

Guzien gatik gaur iraun dezan

                bizirik zuen fedeak.

Herraren harra sartzerat ez utz

                bihotz barneko barnean,

Euskaldungoa, karraka janik,

                zuen baitan hil ez dezan.

Ez dute hilen Euskal-Herria

                gazten gorputza hiltzean;

Gazten bihotza husten badute,

                geroaz ote zer erran?

Maitasun handiz giltzapetuak

                dauden bihotzen ederra!

Herrari gogor fedean xutik

                dauden gizonen indarra!

Etsaiak hartu herra biderat,

                etsitu-eta, ez lerra:

Herriak badu euskal-lurreko

                Jainko-semeen beharra.

Denek amestu eskubideak

                izanik ere guk aurten,

Alfer ginuzke ez bagare gu

                barnez euskaldun egoiten.

Zuen bihotzak, amor emanik,

                huts eta ustel ez diten,

Otoitz kartsutan zuekilan bat

                hara fraideak nun gauden.

              * * *

Hori bakarrik, hori guzia

        hori da gure bizia.

              * * *

Oraiko gudu eta bizia

                gerokoaren hazia,

Jaun Zerukoak gizonen gogo

                eta eskutan utzia.

Herrazko indar abregarria

                fedeaz dadin hazia,

Gure Herria maita dezagun

                maitatuz mundu guzia.

Bortxarik gabe bizitzeko da

                egina gizon-bihotza

Eta bortxazko lokarrietan,

                fedez husturik gabiltza.

Entzun, Jainkoa, fraiden ahotik

                euskal-lurraren otoitza

Eta zabalduz askatasuna

                bihotz orotan gaur mintza.

Gure gazteak, guzien gatik,

                burua gora daudela,

Presondegian, auzitegian

                pilota-plazan bezala.

Zure besoak ilunbetarik

                denak atera ditzala

Izan dezaten geroari so

                esperantzaren hegala.

Heien begiak ez utz gehiago

                ez lano eta ez burdin:

Etsai-indarrak ari direla

                beti nausitzen Euskadin.

Otoizlariek, borrokariek

                dugun egin lan guk berdin,

Euskal-Herria lurreko eta

                geroko bizirat hel dadin.

              * * *

Hod bakarrik, hori guzia

        hori da gure bizia.

              * * *

Gau-intzirika dabil Hegoa:

        «Nun zaitugu nun, Jainkoa?

Gazten bihotza hustuz baitoa,

        akabo dugu geroa.»

Gau-intzirika dabil Hegoa...

Zafratuz lurra, joz itsasoa,

        jauz-araz haren orroa:

Iratzar berriz euskaldungoa,

        sutan pitz gazten gogoa.

Gau-intzirika dabil Hegoa...

Maite baituzu mundu osoa

        eta bakotxen xokoa,

Gauez gau jeiki, Jaun Zerukoa:

        argi euskaldun geroa.

19-9-76