Utzidazu karmina kentzen
Urtzi Urrutikoetxea

Kutxa, 2000

 

 

LERRO TARTEETAKO MAITASUNAK

 

                                           A nigbean a' chùil bhuidhe, throm-bhuidh, òr-bhuidh,

                                           Fonn do bheòil-sa s' gaoir na h-Eòrpa

                                           (Ile beilegizko, beilegi biziko, urre-beilegizko neska

                                           zure ezpainetako doinua eta Europako samina elkarrekin)

                                                                                      SOMHAIRLE MAcGILL-EAIN

 

leihoko pantailan

patruila berdeak landatu dizkidate

eta otoi irratia amatatzeko eskatu,

osterantzean ondo grabatzerik ez daukatela-eta

garbiketa egiten lagunduko didate ausaz

 

ez dute ulertzen

mikrofono direkzionalek

ez dituzte beharrezko eleak konprenitzen ahal

zein den poema gris baten prezioa

armategia lerrotarteetan gordetzen denentz

ala zure izenean bahitu dugun maitasuna

 

cetmeak eusten ditu

hogei urte eskaseko uniforme izutuak

euriaren eskualdean

patrolak eta balak ez uhertzea otoizten du

 

ni nasai antzean bizi naiz egunez

torturaren aurreko eskuliburua estudiatu eta

taktika inuzenteak paratzen ditut

ilunak bere kaputxa armatuak balekartza ere

soto eta estolderietako politikara

bisita gonbita jaso orduko

zure telefono deiek izutzen naute

 

Utzidazu karmina kentzen
Urtzi Urrutikoetxea

Kutxa, 2000