ITZULERA (Western)

 

«Naipeak markatuak daude, bizitza

bera bezala» esan zuen Johnson

trafikatzaileak zigarroa piztutzearekin bat.

Zippoa tapete berdearen gainean utzi eta,

ahalegin nekagarri bat eginez, zilar moneda

bat sartu zuen sinfonolan. Espiritual bat

jarri zuen: «Sweet Georgia Brown.»

Eseri eta bourbonari trago luze bat eman zion.

Urrundik zetorren eta ez zeukan presarik.

Han, guztiek ezagutzen zuten. Erromantiko bat

zela zioten, bere gurasoak traizionatu

zituela Suaren Lurraldean; irakurrita zeuzkala

Tom Sawyeren abenturak eta Hodgsonen ipuinak,

eta behin Montecarloko kasinoan, mertzenari baten

hoztasuna erakutsiz, bi croupier garbitu zituela

bere esanak ez betetzeagatik; aktore lanetan

ibili zela Haitin bolada luze batez eta gizon hark

ez zuela irteerarik gabeko kalerik ezagutzen,

bakarrik ibili ohi zela beti arriskuaren aurrean.

Gaua astiro erori zen, bitriolozko musuen gisara

ezken gorputz nekatuak blaituz. Johnson, beste

trago bat edan eta altxa egin zen. Gero, eskuak

gerrietara herabe eraman eta, Wayneren plantak

eginez, astiro esan zuen: «zure bila nator.

Nonahi zaudela ere, nerekin eramango

zaitut. Bizirik ala nigan.»

 

92-I-3